"Росатом": Беларусь абгоніць РФ і ЗША па ўдзельнай вазе атамнай электрычнасці
© Sputnik / Илья Питалев
/ Падпісацца
У бліжэйшы час атамная станцыя, якая пабудавана на захадзе Беларусі, пачне працаваць на поўную магутнасць: электрычнасць будуць выпрацоўваць два энергаблокі.
МІНСК, 16 кас – Sputnik. Другі блок Беларускай АЭС юрыдычна знаходзіцца ў рэжыме вопытна-прамысловай эксплуатацыі, заявіў гендырэктар дзяржкарпарацыі "Росатом" Аляксей Ліхачоў, перадае карэспандэнт Sputnik.
Ён адзначыў, што на мінулым тыдні на энергаблоку быў завершаны вялікі комплекс выпрабаванняў – магутнасці, манеўранасці і надзейнасці сістэм.
"І фінал гэтых выпрабаванняў – гэта комплекснае апрабаванне, выкарыстанне блока на максімальна магчымай магутнасці на працягу двух тыдняў. Вынікі выключна пазітыўныя", - сказаў Ліхачоў журналістам пасля рабочай сустрэчы з беларускім прэм’ерам Раманам Галоўчанкам у панядзелак.
Паводле яго слоў, выпрабаванні, якія прайшлі на Беларускай атамнай станцыі, праводзяцца на расійскіх АЭС – Варонежскай і Ленінградскай.
"Мы вельмі задаволены вынікамі працы, вельмі спадзяемся, што такое ж меркаванне і ў заказчыка", - канстатаваў кіраўнік "Росатома".
Ён падкрэсліў, што ў ходзе будаўніцтва станцыі ў рэспубліцы былі задзейнічаны самыя лепшыя тэхналогіі. Адначасова з гэтым актыўны ўдзел у рабоце прынялі беларускія будаўнікі.
Пасля чаго дадаў, што першы блок станцыі ўжо выпрацаваў больш за 18 млрд кілават-гадзін – "гэта вельмі сур’ёзны ўклад у энергазабеспячэнне Беларусі".
Самы сучасны і бяспечны
Ліхачоў адзначыў, што да беларускай станцыі прыкавана ўвага ўсёй сусветнай атамнай сям’і – і МАГАТЭ, і спецыялістаў з усёй планеты.
"Вельмі рэдка зараз уводзяцца ў строй на планеце новыя атамныя блокі, на жаль. І яшчэ радзей яны ўводзяцца ў эксплуатацыю па экспартнай схеме. У гэтым годзе, напэўна, толькі беларусы могуць пахваліцца, што па схеме экспарту, па схеме паставак экспартных тэхналогій пабудаваны і уведзены ў эксплуатацыю самы сучасны і самы бяспечны блок на планеце", - удакладніў ён.
Наперадзе планеты ўсёй
Гендырэктар расійскай энергетычнай дзяржкарпарацыі звярнуў увагу, што паводле разлікаў "Росатома" і Мінэнерга рэспублікі, каля 25% электрычнасці ў краіне будзе выпрацоўвацца на БелАЭС да канца 2023 года.
"Гэта значыць, што за спіной (у Беларусі - Sputnik) застанецца не толькі Вялікабрытанія, Канада, але і Расійская Федэрацыя, а таксама Злучаныя Штаты Амерыкі. Беларусь абгоніць (гэтыя краіны - Sputnik) па ўдзельнай вазе атамнай электрычнасці", - акцэнтаваў Аляксей Ліхачоў.
На заканчэнне ён падкрэсліў, што "Росатом" плануе і далей развіваць супрацоўніцтва з Беларуссю, прычым не толькі ў атамным напрамку, але і ў неэнергетычных ядзерных тэхналогіях (ядзерная медыцына, назапашвальнікі энергіі, кампазіты, 3D-друк і гэтак далей).
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Чытайце таксама:
Планавы рамонт пачаўся на першым энергаблоку БелАЭС
Медыцына, экалогія і лічбавізацыя: "Росатом" прапанаваў Беларусі праграму
Лукашэнка не выключыў магчымасці будаўніцтва другой АЭС у Беларусі
