Прэм’ер Башкортастана дэталёва расказаў аб супрацоўніцтве з Беларуссю
10:58 09.02.2024 (абноўлена: 11:09 09.02.2024)
© Sputnik / Фотохост-агентство РИА Новости
/ Падпісацца
Эксклюзіў
Беларусь і Башкортастан не першы год звязваюць моцныя гандлёвыя адносіны. Рэспубліка і расійскі рэгіён супрацоўнічаюць у машынабудаванні, сельскай гаспадарцы, турызме, культуры і іншых сферах.
Гэтымі днямі вялікая дэлегацыя Башкортастана наведвае Беларусь. Гэта не першы візіт кіраўніцтва рэгіёна ў нашу краіну, кожны з іх прыводзіў да рэальных вынікаў і сур’ёзных дамоўленасцей.
Уфа і Мінск ужо даўно сталі надзейнымі партнёрамі – такое моцнае рэгіянальнае супрацоўніцтва дазваляе нарасціць эканоміку і рэалізаваць імпартазамяшчальныя інвестыцыйныя праекты. Аб сумесных праектах прэм’ер-міністр Башкортастана Андрэй Назараў расказаў у эксклюзіўным інтэрв’ю Sputnik Беларусь.
Аўтобусы, смеццявозы і не толькі
У першы дзень візіту кіраўнік башкортастанскага ўрада наведаў Мінскі аўтамабільны завод, дзе падрабязна вывучыў усю лінейку тэхнікі.
"Прапанавалі (беларускаму боку - Sputnik) некалькі варыянтаў сумесных праектаў", - сказаў ён.
Першы напрамак – прадоўжыць работу па пастаўках машынакамплектаў для вытворчасці тралейбусаў на Уфімскі трамвайна-тралейбусны завод. У мінулым годзе Башкортастан закупіў 248 зборачных камплектаў, на гэты год запланавана пастаўка 255.
Уфімскія тралейбусы, створаныя на базе машынакамплектаў МАЗ, цяпер працуюць у розных гарадах Расіі: Новасібірску, Хабараўску, Чэбаксарах, Пензе, Каўрове, Растове-на-Доне і іншых.
Другі напрамак – пастаўка смеццявозаў МАЗ. Паводле слоў Назарава, зараз у Башкортастане ідзе смеццевая рэформа, таму рэгіён вельмі цікавіць набыццё аўтамабіляў для перавозкі смецця.
Акрамя таго, Уфа хоча набыць для свайго аэрапорта перонныя аўтобусы ад Мінскага аўтазавода.
"Дамовіліся аб тым, што яны (аўтобусы - Sputnik) пройдуць пэўны пробны перыяд для таго, каб пацвердзіць свае тэхнічныя характарыстыкі. Калі яны будуць пацверджаны, то мы іх купім у МАЗа. Напэўна, гэта сімвалічна, што ва ўфімскім аэрапорце, адным з рэгіянальных аэрапортаў Расійскай Федэрацыі, якія найбольш дынамічна развіваюцца, будуць перавозіць пасажыраў якраз мазаўскія аўтамабілі", - падкрэсліў Назараў.
Таксама Башкортастан думае над тым, каб набыць у Мінску турыстычныя аўтобусы.
"У мінулым годзе мы якраз закупілі вялікую партыю з Кітайскай Народнай Рэспублікі. Але, вядома, вельмі хацелі б і ў гэтым напрамку супрацоўнічаць з нашымі калегамі з Мінска. МАЗаўскія турыстычныя аўтобусы нам падаліся вельмі прывабнымі", - адзначыў прэм’ер.
Супрацоўніцтва з "Амкадорам"
Асобна Андрэй Назараў закрануў тэму супрацоўніцтва з "Амкадорам" – адной з найбуйнейшых беларускіх машынабудаўнічых кампаній, якія вырабляюць камунальную, сельскагаспадарчую, дарожна-будаўнічую і іншую тэхніку.
"Амкадор" – гэта адкрыццё нашага мінулага візіту (у Беларусь - Sputnik). Былі прыемна ўражаны ўбачаным і таму прапанавалі кіраўніцтву прадпрыемства ўмовы, ад якіх было складана, мусіць, адмовіцца. Вынікам гэтых дамоўленасцей стаў першы завод па вытворчасці зернесушыльнага абсталявання (ва Уфе - Sputnik)", - нагадаў старшыня ўрада Башкортастана.
Ён удакладніў, што завод быў пабудаваны за кароткія тэрміны (усяго дзевяць месяцаў), і попыт на яго прадукцыю адчувальны. Цяпер "Амкадор" і ўлады Башкортастана рэалізуюць новы праект – прадпрыемства "Амкадор-Алга" па вытворчасці камунальнай дарожнай тэхнікі.
"Мы вызначылі шэраг мадэлей, якія найбольш запатрабаваны зараз на тэрыторыі Башкортастана і Расійскай Федэрацыі <…> Плануем, што праз год мы яго здадзім і будзем выпускаць гэтую камунальную дарожную тэхніку. Такім чынам, мы часткова закрыем свае патрэбы. Ну, і ў далейшым у нас з "Амкадорам" ёсць яшчэ шэраг праектаў – яшчэ больш маштабных нават, чым гэтыя два, аб якіх я кажу", - канстатаваў прэм’ер-міністр.
Верталёты і беспілотнікі
Андрэй Назараў таксама расказаў, што пабываў у кітайска-беларускім індустрыяльным парку "Вялікі камень" пад Мінскам. Адзін з рэзідэнтаў парку сумесна з расійскімі партнёрамі развівае праекты ў сферы беспілотных лятальных апаратаў.
"У нас з імі ўжо ёсць пагадненне, ёсць першы заказ. Таму мы хочам і набыць, і зрабіць у сябе максімальную лакалізацыю. Таму што ў нас у Башкортастане створаны якраз кластар беспілотнай лятальнай авіяцыі. Расійскім урадам нам дадзены эксперыментальны прававы рэжым, які дазваляе запускаць беспілотнікі да іх сертыфікацыі, што паскарае працэс выпрабаванняў прыкладна на паўтара-два гады", - праінфармаваў ён.
Прэм’ер таксама выказаўся наконт супрацоўніцтва ў сферы вялікай авіяцыі, а менавіта магчымых паставак у Беларусь верталётаў Ка-32. Гэтыя вінтакрылыя машыны вырабляюцца ў расійскім горадзе Кумяртау і выкарыстоўваюцца ў асноўным для пошукава-выратавальных аперацый, а таксама пры тушэнні пажараў.
"Мы з задавальненнем хацелі б супрацоўнічаць з беларускім бокам па пастаўцы Ка-32 і спадзяёмся, што падчас цяперашняга візіту прасунемся ў гэтым пытанні", - сказаў кіраўнік урада Башкортастана.
Нафта
Башкортастан лічыцца адным са старэйшых нафтаздабываючых рэгіёнаў Расіі. У рэгіёне здабываецца каля 3% усёй расійскай нафты, а рэспубліка займае першае месца сярод суб’ектаў РФ па аб’ёмах перапрацаванага чорнага золата.
"На сённяшні дзень мы здабываем прыкладна да 15 млн тон у год, а перапрацоўваем да 26 млн тон. Дастаткова развіта нафтахімічная вытворчасць", - падзяліўся лічбамі Назараў.
Прэм’ер-міністр расказаў, што львіную долю экспарту ў Беларусь займаюць пастаўкі прадуктаў нафтахіміі.
"Гэта тое, чаго Беларусі не дастае. Пры гэтым мы ведаем, што ў Рэспублікі Беларусь ёсць кампетэнтныя людзі (спецыялісты ў нафтахімічнай сферы - Sputnik). Таму мы з задавальненнем хочам і гатовы супрацоўнічаць і ў гэтай сферы", - адзначыў Андрэй Назараў.
Турызм
З нядаўняга часу Беларусь і Башкортастан сумесна развіваюць турызм. Штогод тысячы беларускіх падарожнікаў едуць глядзець на прыгажосць башкірскага краю, у сваю чаргу жыхары гэтага расійскага рэгіёна прыязджаюць палюбавацца нашай прыродай.
"У свой час кіраўніком рэспублікі было прынята рашэнне аб стварэнні ўнікальнага праекта, які дае магчымасць "сярэбранаму" ўзросту – людзям, якія ўжо крыху вызвалены ад актыўнай работы – падарожнічаць па нашым родным краі. Праект называецца "Башкирское долголетие. Туризм". І за гэтыя тры гады больш за 30 тысяч людзей падарожнічалі па Башкортастане", - прывёў статыстыку прэм’ер Башкортастана.
У Мінск прыбылі першыя турысты па праграме "Башкирское долголетие"
© Photo : Азат Махмутов
Потым улады рэгіёна прыйшлі да высновы, што турыстычную праграму можна пашырыць і на Беларусь. Так з’явіўся праект "Башкірска-беларускае" даўгалецце.
"У рамках праекта нашы жыхары паехалі ў Беларусь, а беларускія – у Башкортастан. І вось за мінулы год больш за 1 600 чалавек змаглі скарыстацца гэтай праграмай. Усе вельмі задаволены. На гэты год таксама запланавана не меншая колькасць турыстаў "сярэбранага" ўзросту з абодвух бакоў для такіх падарожжаў", - падсумаваў Назараў.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
10 кастрычніка 2023, 17:32
