Галасуюць датэрмінова: рэпартаж з самага вядомага выбарчага ўчастка Беларусі
© Sputnik / Виктор Толочко
Падпісацца
Участак для галасавання №478 ужо больш за 20 гадоў размяшчаецца ў будынку БДУФК, ён часцей за ўсіх трапляе ў аб’ектывы тэле- і фотакамер – менавіта тут галасуе прэзідэнт Беларусі Аляксандр Лукашэнка.
У Беларусі 20 лютага апоўдні пачалося датэрміновае галасаванне на выбарах у парламент і мясцовыя саветы, у краіне адкрылася больш за 5,4 тыс выбарчых участкаў. Як пачаўся гэты этап выбарчай кампаніі, Sputnik паглядзеў на самым вядомым у краіне ўчастку для галасавання.
Ён размяшчаецца ва ўніверсітэце, дзе рыхтуюць кадры для беларускага спорту і турызму, таму першымі, хто прыйшоў яшчэ за некалькі хвілін да адкрыцця ўчастка, былі студэнты БДУФК.
Датэрміновае галасаванне
© Sputnik / Виктор Толочко
Новыя патрабаванні
Гэтая выбарчая кампанія праходзіць у адпаведнасці з абноўленым заканадаўствам. Аб новаўвядзеннях, шрыфце Брайля, а таксама аб буфеце ў асноўны дзень выбараў карэспандэнту Sputnik Тамары Бяляевай распавёў старшыня выбарчай камісіі №478 Аляксей Гататулін.
"Кабіны для галасавання ў нас абсталяваны ў адпаведнасці з усімі патрабаваннямі. Асноўнае з іх – каб шторкі, дзверы былі абавязкова адчынены. Бо новыя нормы забараняюць фатаграфаваць у кабінах. Шторы адкрыты для таго, каб члены камісіі маглі бачыць, што парушэнняў няма", - растлумачыў ён.
У кабінках для галасавання ёсць спецыяльнае папярэджанне, што фота- і відэаздымка забаронена.
Без абеду
У адпаведнасці з патрабаваннямі заканадаўства, для датэрміновага галасавання ўстанаўліваецца асобная урна. За некалькі хвілін да пачатку галасавання яе апячатваюць. "Каб роўна ў 12:00 прыступіць да галасавання", - тлумачыць старшыня камісіі.
На гэтых выбарах выбарчыя ўчасткі падчас датэрміновага галасавання не будуць закрывацца на абед – каб працуючыя выбаршчыкі маглі прыйсці на ўчастак падчас свайго абедзеннага перапынку.
Апячатаць урну
Працэдура апячатвання скрыні для галасавання адбываецца ў прысутнасці членаў выбарчай камісіі, нацыянальных назіральнікаў, журналістаў.
© Sputnik / Виктор Толочко
Калі ўсе пераканаліся, што выбарчая скрыня пустая, старшыня і адзін з членаў камісіі запячатваюць яе зялёным "сургучом" і ставяць пячатку. Скрыню адчыняць толькі ў пачатку падліку галасоў.
Трафарэты і зручныя кабінкі
Як і на ўсіх іншых выбарчых участках краіны, тут ёсць трафарэты для невідушчых, павелічальнае шкло для выбаршчыкаў з аслабленым зрокам.
А для людзей з абмежаванымі магчымасцямі ёсць шырма, да якой можна пад’ехаць на калясцы, а ў адной з кабін – спецыяльная падстаўка.
© Sputnik / Виктор Толочко
Шмат вядомых людзей
Старшыня выбарчай камісіі просіць не акцэнтаваць увагі на тым, што 478-ы выбарчы ўчастак нейкі асаблівы.
"Больш за 20 гадоў на базе нашага ўніверсітэта арганізоўваюць участкі для галасавання, вельмі шмат супрацоўнікаў і выкладчыкаў бяруць удзел у іх працы – у складзе членаў камісіі, назіральнікаў. Мы ўсе з хваляваннем і гонарам прымаем удзел у выбарчых кампаніях. Так, сапраўды, шмат вядомых людзей прыходзіць да нас на ўчастак, у тым ліку ажыццяўляе сваё волевыяўленне", - распавядае ён.
© Sputnik / Виктор Толочко
Пры гэтым ён падкрэслівае, што выбары на гэтым участку праходзілі і праходзяць абсалютнага рознага ўзроўню – і ў мясцовыя саветы, і ў Палату прадстаўнікоў, і выбары прэзідэнта, і рэферэндум.
"Мы заўсёды аднолькава адказна рыхтуемся, незалежна ад таго, якога ўзроўню праходзяць выбары", - падкрэсліў субяседнік агенцтва.
Меркаванне назіральніка
Нацыянальны назіральнік Валянціна Ананьева адзначыла, што сёння першыя выбаршчыкі прыйшлі на ўчастак яшчэ да яго адкрыцця.
"Радуе тое, што людзі актыўна галасуюць, выказваюць сваю пазіцыю", - кажа яна.
Падарылі Канстытуцыю
У гэтым годзе на выбарах ёсць яшчэ адна навацыя – усім маладым выбаршчыкам, якія галасуюць упершыню, дораць Канстытуцыю. Яна ў добрай цвёрдай вокладцы – бардовая невялікая кніжка, якая змесціцца ў кішэні.
Сваімі ўражаннямі ад першых у сваім жыцці выбараў падзяліўся Міхаіл Мароз, студэнт факультэта менеджменту, спорту і турызму БДУФК, будучы інструктар у сферы турызму.
"У мяне будзе вельмі добрая спецыяльнасць, якая дазволіць мне рухацца далей па жыцці. Я першы раз галасую і атрымаў у падарунак Канстытуцыю. Я яе абавязкова пачытаю", - кажа юнак.
Буфет і канцэрт будзе
Ні для каго не сакрэт, што ў асноўны дзень галасавання выбаршчыкі пасля таго, як прагаласуюць, ідуць у буфет.
"Традыцыйна ў дзень асноўнага галасавання ў нас працуе буфет, каб выбаршчыкі, госці, прадстаўнікі СМІ маглі спакойна перакусіць, выпіць кавы, адпачыць", - расказвае старшыня камісіі.
© Sputnik / Виктор Толочко
Паводле яго слоў, 25 лютага на ўчастку і на пляцоўцы перад БДУФК будуць выступаць творчыя калектывы, вядомыя выканаўцы, спевакі, музыканты, будзе ўрачыстая і святочная абстаноўка.
Адказваючы на пытанне Sputnik аб тым, чым выбаршчыкаў парадуюць у буфеце, старшыня камісіі сказаў:
"Нас з меню ніхто не знаёміць. Але ўпэўнен, што будуць і мясныя, і хлебабулачныя вырабы, сыры, смачныя саленні, беларускія цукеркі, шакалад".
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
