Мафусаіл, Стары Ціка і іншыя: найстарэйшыя дрэвы і кланальныя расліны свету

Дрэва Мафусаіл прарасло яшчэ да таго, як былі пабудаваны егіпецкія піраміды і доўгі час лічылася самым старым у свеце. Яго так назвалі ў гонар біблейскага персанажа Мафусаіла, які пражыў 969 гадоў.

Узрост жа дрэва (дарэчы, гэта сасна калючая міжгорная) ацэньваецца больш за 4 850 гадоў: прыблізная ацэнка часу прарастання насення, з якога вырасла дрэва, – 2 831 год да нашай эры.

У 2012 годзе была адкрыта іншая сасна – таго ж віду, што і Мафусаіл, але старэй.

Стары Ціка расце на гары Фулуф’елет у правінцыі Даларна ў Швецыі, гэта экзэмпляр елі звычайнай. Лічыцца старэйшым з вядомых жывых экзэмпляраў гэтага віду дрэў.

Надземная частка расліны жыве не больш за 600 гадоў, аднак, як паказаў генетычны аналіз і даследаванне з дапамогай радыёвуглеродным метаду, узрост каранёвай сістэмы Старога Ціка складае каля 9 565 гадоў. Акрамя таго, у гарах Фулу былі выяўлены яшчэ 20 ялін узростам больш за 8 000 гадоў.

Сарв-э-Абарку, таксама вядомы як зараастрыйскі сарв, – гэта кіпарыс, узрост якога ацэньваецца ў 4 000 гадоў.

На Самшытавай вуліцы ў Сочы знаходзіцца ўваход у дзіўны ціса-самшытавы гай. Тут можна ўбачыць расліны, якім каля дзвюх тысяч гадоў.

Джая Шры Маха Бодхі – фікус свяшчэнны, які расце ў Анурадхапуры, Шры-Ланка. Па легендзе, ён вырашчаны з парастка Дрэва Бодхі, пад якім прынц Гаўтама дасягнуў прасвятлення і стаў Будай. Дрэва высаджана ў 288 годзе да н.э., гэта найстарэйшае жывое дрэва, пасаджанае чалавекам.

Тэ Матуа Нгаерэ (у перакладзе – бацька лесу) – найстарэйшы экзэмпляр кауры (адна з найстаражытных іглічных парод, сустракалася ўжо падчас юрскага перыяду, прыкладна 150 млн гадоў назад). Гэта самае старое дрэва ў Новай Зеландыі, па розных ацэнках яго ўзрост складае ад 1 500 да 3 000 гадоў. Вышыня ствала – 10 метраў, агульная вышыня дрэва – 30 метраў, дыяметр – 5 метраў.

Пандо (таксама вядомая як "Трапятлівы гігант") – кланальная калонія таполі асінападобнай у ЗША, узрост якой ацэньваецца ў 80 000 гадоў.

Пандо лічыцца адзіным жывым арганізмам на падставе ідэнтычных генетычных маркераў і агульнай каранёвай сістэмы. Кланальная калонія ахоплівае плошчу, роўную 43 га, вага расліны ацэньваецца ў 6 000 тон, што робіць яе самым цяжкім вядомым арганізмам.

Узрост цісаў вызначыць дастаткова складана. Ціс Лангерніў, які расце ў паўночным Уэльсе, лічыцца адным з найстаражытных – яму 4 000-5 000 гадоў. Асноўная частка дрэва да нашых дзён не захавалася, засталося толькі некалькі вялізных адгалінаванняў.

Аліва Воўвес лічыцца найстарэйшым аліўкавым дрэвам у свеце. Дакладны ўзрост вызначыць нельга: выкарыстанне радыеізатопаў немагчыма, паколькі яго асяродак быў згублен на працягу стагоддзяў, а аналіз гадавых кольцаў паказаў, што ўзрост дрэва складае не менш за 2 000 гадоў.

Пры гэтым аліва да гэтага часу плоданосіць. Галіны дрэва выкарыстоўваліся для пляцення вянкоў пераможцаў Алімпійскіх гульняў 2004 года ў Афінах і Алімпійскіх гульняў 2008 года ў Пекіне.

Каяна Асугі – дрэва крыптамерыі (сугі) у прэфектуры Ісікава, Японія. Адно з чатырох дрэў, якія лічацца свяшчэннымі на тэрыторыі храма Сугавара, яно атрымала знак асаблівага прыроднага помніка ад Агенцтва па справах культуры Японіі.

У 1928 годзе прафесар Манабу Міёсі з Імператарскага ўніверсітэта Токіа ацаніў узрост дрэва ў 2 300 гадоў.

Дрэва Туле – экзэмпляр таксодыума мексіканскага, які расце на плошчы побач з царквой у горадзе Санта-Марыя-дэль-Туле (Мексіка).

Узрост дрэва невядомы і складае, па розных ацэнках, ад 1 200 да 3 000 гадоў, а па адной з гіпотэз – каля 6 000 гадоў, часцей за ўсё ўзрост вызначаецца як 1 433-1 600 гадоў.

Паводле сапатэкскай легенды, прыкладна 1 400 гадоў таму гэтае дрэва пасадзіў жрэц Эхекатля, бога ветра, што ўяўляецца блізкім да праўды, паколькі дрэва расце на былым святым месцы індзейцаў, якое пазней перайшло да каталіцкай царквы.

Гран Абуэла (таксама вядома як Алерсе Міленарыа, у англамоўным асяроддзі – Прадзядуля) – гэта экзэмпляр фіцроі (адносіцца да сямейства кіпарысавых), які расце ў нацыянальным Парку Алерсе-Кастэра ў Чылі.

Паводле даных аднаго з даследаванняў, узрост дрэва складае не менш за пяць тысяч гадоў, зараз праводзіцца праверка тэорыі аб яго ўзросце. Магчыма, гэта найстарэйшае ў свеце дрэва.