Навіцкі аб палёце Васілеўскай у космас: Беларусь зрабіла правільны выбар
© Sputnik / Павел Вур
Падпісацца
Беларусь і Расія ў рамках Саюзнай дзяржавы вядуць актыўную сумесную работу па асваенні космасу, дзякуючы чаму стаў магчымы палёт на МКС першай беларускай касманаўткі.
ВІЦЕБСК, 28 чэр – Sputnik. У гэтыя дні адразу ў некалькіх гарадах Віцебскай вобласці праходзіць XI Форум рэгіёнаў Беларусі і Расіі. Мерапрыемства атрымалася маштабным, напоўненым масай важных і цікавых падзей. Адной з такіх стала сустрэча з касманаўтам Алегам Навіцкім.
У ходзе яе ён асабліва адзначыў, што Беларусь зрабіла правільны выбар, адправіўшы ў космас Марыну Васілеўскую.
Паводле яго слоў, яна не толькі поўнасцю справілася з усімі пастаўленымі задачамі, у тым ліку і з правядзеннем эксперыментаў на МКС, але пры гэтым дастойна праявіла сябе "ў быце".
"Марына стала правільным выбарам: калі на МКС прылятае кароткачасовая экспедыцыя, нават якая складаецца з прафесіяналаў, і пачынае супрацоўніцтва з доўгачасовай, заўсёды ўзнікаюць нейкія бытавыя праблемы. Нават я, перыядычна, бываючы на станцыі, заўважаю, што на ёй кожны раз штосьці мяняецца, але з Марынай у нас у гэтым плане ніякіх праблем не ўзнікала", - сказаў касманаўт.
Не ўзнікла з першай беларускай касманаўткай, паводле слоў Навіцкага, на борце МКС і праблем, звязаных з гумарам.
Ён растлумачыў, што гумар у космасе асаблівы: жарты, як правіла, стрыманыя і паліткарэктныя. Касманаўты не жартуюць на тэму палітыкі, рэлігіі, сям’і і нават імкнуцца не закранаць падобныя тэмы ў размовах, калі субяседнік сам не захоча на гэтую тэму паразмаўляць. Экіпаж МКС звычайна складаецца з прадстаўнікоў розных краін, таму нават, здавалася б, бяскрыўдны жарт можа незнарок каго-небудзь закрануць, дадаў Навіцкі.
"Я, як чалавек ваенны, магу, ох, як пажартаваць, але даводзіцца гумар фільтраваць", - прызнаўся ён і падкрэсліў, што з Марынай Васілеўскай ніякага неразумення ў гэтым плане не ўзнікала, бо "яна наш, беларускі чалавек".
Беларусь – касмічная дзяржава
На сустрэчы Алег Навіцкі выказаў словы падзякі ў адрас прэзідэнтаў Расіі і Беларусі Уладзіміра Пуціна і Аляксандра Лукашэнкі за тое, што яны далі магчымасць ажыццявіць праект з адпраўкай першага беларускага касманаўта на Міжнародную касмічную станцыю.
Падзякаваў расійскаму боку і начальнік упраўлення аэракасмічнай дзейнасці апарату НАН Беларусі Пётр Віцязь, падкрэсліўшы, што "без дапамогі суседзяў такі палёт адбыцца не мог бы".
"Беларусь і Расія ў касмічнай сферы працуюць працяглы час, у нас падпісана міжурадавае пагадненне, і ў рамках Саюзнай дзяржавы вядзецца актыўная сумесная работа па асваенні космасу", - адзначыў акадэмік.
Саюзныя тэхналогіі, у тым ліку, выкарыстоўваюцца і ў стварэнні новай Расійскай арбітальнай станцыі, якая заменіць айчынны сегмент МКС, дадаў ён.
На пытанне, ці плануецца новы палёт беларусаў у космас, Пётр Віцязь сказаў, што "хацелася б, каб такі палёт адбыўся".
На гэта Алег Навіцкі адзначыў, што, калі рыхтаваўся палёт Марыны Васілеўскай у космас, на ўзроўні памочніка прэзідэнта РФ узнімалася пытанне аб унясенні некаторых змяненняў у расійскае заканадаўства.
"Цяпер па законе расійскім касманаўтам можа стаць толькі грамадзянін Расійскай Федэрацыі, мы ж прапануем унесці змяненні, каб грамадзяне Беларусі мелі роўныя магчымасці з грамадзянамі Расіі па адборы ў касманаўты", - растлумачыў ён.
Філасофія космасу
Алег Навіцкі падчас сустрэчы адзначыў, што ён нарадзіўся і вырас у Беларусі, але даўно з’яўляецца грамадзянінам Расіі, таму яму блізкія абедзве краіны.
Касманаўт таксама расказаў, што пасля палёту ў космас стаўленне да планеты Зямля моцна мяняецца.
"Калі бачыш Зямлю зверху, успрымаеш яе цэласна, ці што… Не так, як паказана на картах, з межамі дзяржаў, а як унікальную планету, дзе мы жывём. Усе ў космасе становяцца крыху філосафамі ў гэтым плане. Пасля палёту хочацца сказаць людзям: "Супакойцеся, жывіце ў міры, працуйце ўсе разам на агульную карысць. Планета адна, яна не такая ўжо і вялікая, і яе трэба бараніць", - падкрэсліў Навіцкі.
Па словах касманаўта, на арбіце прыходзяць думкі аб тым, што трэба аб’яднаць народы, каб яны вырашалі свае праблемы не сілай, а стварэннем, абаранялі жыццё на зямлі і развівалі касмічныя тэхналогіі, якія потым спатрэбяцца і на Зямлі.
Навіцкі распавёў, што падчас яго выхаду ў адкрыты космас яму раптам прыйшла думка: вось ён зараз лунае каля касмічнага карабля, а на Зямлі ў гэты момант людзі заняты сваімі справамі, – хтосьці знаходзіцца ў дарозе, хтосьці спіць, хтосьці працуе... Гэта значыць, там, у космасе, мышленне становіцца зусім іншым, набывае іншыя, нязвыклыя, глабальныя маштабы і, нягледзячы на вялікую адлегласць ад планеты, асабліва востра адчуваецца сувязь з усім астатнім чалавецтвам, растлумачыў касманаўт.
На пытанне, ці верыць ён у існаванне жыцця на іншых планетах, Алег Навіцкі адказаў, што людзі "корпаюцца" ў космасе пакуль што ўсяго толькі за 400 кіламетраў ад Зямлі, а з такой адлегласці меркаваць аб незямным жыцці вельмі цяжка.
"Каб вы разумелі маштаб Сусвету, прывяду такі прыклад. Аднойчы касманаўты на МКС убачылі ўдалечыні камету… Хуткасць палёту камет велізарная, але на працягу трох сутак яна не знікала з іх поля зроку. Гэта значыць касманаўты рабілі абарот вакол Зямлі і назіралі камету з адной і той жа кропкі, і так тры дні запар, пакуль яна не схавалася з вачэй. Уяўляеце, якую велізарную адлегласць яна праляцела, застаючыся пры гэтым бачнай? Так што, зразумела, касманаўты не выключаюць, што ў такім вялізным Сусвеце чалавецтва не адзінока", - сказаў Алег Навіцкі.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
