МЗС: Лукашэнка прапанаваў Польшчы накіраваць дэлегацыю на мяжу
09:58 15.07.2024 (абноўлена: 10:09 15.07.2024)
© AFP 2024 / WOJTEK RADWANSKI
Падпісацца
Беларускае знешнепалітычнае ведамства гатова да дыялогу з Польшчай, аднак Варшава пакуль што ўхіляецца.
МІНСК, 14 ліп – Sputnik. Дзеянні Польшчы на мяжы не прыносяць нічога, акрамя нязручнасцяў для перавозчыкаў, найперш польскіх, заявіў журналістам міністр замежных спраў Беларусі Максім Рыжанкоў, перадае карэспандэнт Sputnik.
Па словах Рыжанкова, Мінск гатоў да дыялогу, але Варшава пакуль што ўхіляецца.
"Нядаўна кіраўнік нашай дзяржавы прапанаваў польскаму боку, і гэтая пазіцыя была даведзена да часовага паверанага Польшчы ў Рэспубліцы Беларусь... Што мы гатовы прыняць любую польскую дэлегацыю, любых польскіх экспертаў, спецыялістаў, прадстаўнікоў кіраўніцтва для таго, каб разам паглядзець сітуацыю на мяжы", - паведаміў міністр.
Таксама кіраўнік МЗС адзначыў, што беларускі бок адзначае "абсалютна ліхаманкавыя і бессістэмныя дзеянні" Польшчы на мяжы.
"...Нічога, акрамя вялізных нязручнасцяў перавозчыкам, сярод якіх у асноўным толькі польскія перавозчыкі... Вы ведаеце, у адпаведнасці з такімі рашэннямі Еўрасаюза, нічога, акрамя гуманітарных праблем для грамадзян, якія перасякаюць мяжу, сярод якіх і дзеці, і малалетнія дзеці, і шматдзетныя сем’і. Вось нічога гэтыя дзеянні не прыносяць", - ацаніў сітуацыю на мяжы Рыжанкоў.
Ён таксама падкрэсліў, што Мінск заўсёды быў за наладжванне добрасуседскіх адносін і трансгранічнага супрацоўніцтва.
"У ручве гэтых падыходаў заўсёды прапаноўвалі польскаму боку супрацоўніцтва па вырашэнні любых пытанняў, якія ўзнікаюць на нашай мяжы. Гэта наша мяжа. Мы адказныя разам за яе, але польскі бок пад рознымі падставамі ўхіляецца ад, увогуле, рэалізацыі нашых прапаноў", - адзначыў кіраўнік МЗС.
Фэйкі аб лагерах
Міністр нагадаў, што ў Польшчы шмат гаварылі аб тым, што нібыта ў Беларусі ёсць цэлыя лагеры, дзе "рыхтуюць нейкіх бежанцаў, мігрантаў, каб яны потым "сілавымі метадамі змагаліся на мяжы".
"Прэзідэнт (Беларусі - Sputnik) сказаў: "Калі вы ведаеце, дзе гэтыя лагеры, калі вы ведаеце... прадстаўнікоў Беларусі, якія там займаюцца падобнымі дзеяннямі, калі ласка, прыязджайце, пакажыце нам любы пункт на тэрыторыі Беларусі. Мы вам там доступ любы забяспечым разам з нашымі спецыялістамі", - адзначыў міністр.
Ён падкрэсліў, што ў такім выпадку фэйкі аб лагерах будуць абвергнуты. Аднак польскі бок адмовіўся ад прапановы прыехаць.
Больш за тое, Варшава пачала вылучаць палітычныя прапановы, якія павінны стаць асновай для таго, каб прыехалі польскія прадстаўнікі.
"Мы такую сітуацыю, зразумела, лічым непрымальнай", - сказаў Рыжанкоў.
Мяч у Польшчы
Рыжанкоў дадаў, што Беларусь запрашае прыехаць і "іншыя любыя арганізацыі". Гэта могуць быць і прадстаўнікі краін ЕС, якія знаходзяцца ў Беларусі. Яны могуць азнаёміцца з сітуацыяй на мяжы.
"...Прыехаць, паглядзець, пагаварыць, падыскуціраваць, намеціць нейкія планы дзеянняў. Бліжэй да восені мы зробім вельмі вялікі грунтоўны брыфінг па гэтай тэме з прысутнасцю праваахоўных органаў, міжнародных арганізацый, якія мы запросім", - паведаміў міністр.
Ён нагадаў, што два гады таму ў Беларусі быў спецдакладчык Савета ААН па правах чалавека (СПЧ ААН) па пытанні аб правах мігрантаў Феліпе Гансалес Маралес.
"...Які ўжо тады знайшоў нашу пазіцыю ў пэўнай ступені правільнай. Ацаніў нашу гатоўнасць да дыялогу, перагавораў і вырашэння вось гэтых пытанняў трансгранічных... Менавіта ён у сваім дакладзе адзначыў шэраг праблемных пытанняў ужо з польскага боку", - сказаў Рыжанкоў.
Міністр растлумачыў, што ў дакладзе гаварылася аб "выцісканні" мігрантаў і парушэнні іх праў, аб негуманным стаўленні да жанчын і дзяцей на мяжы.
"Таму мяч на польскім баку. Вось мы гатовы да дыялогу. Прэзідэнт (Беларусі - Sputnik) на гэта настроены, але, відаць, польскаму боку не вельмі цікава вырашэнне гэтага пытання", - мяркуе Рыжанкоў.
Міністр выказаў меркаванне, што ў планах Варшавы – працяг нагнятання напружанасці на мяжы.
Загарода на мяжы
Кіраўнік МЗС звярнуў увагу, якія вялізныя грошы выдзяляюцца на загароду на мяжы – прыкладна 2,5 млрд долараў.
"...Абсалютна непатрэбны гэты плот, які там абсалютна не з’яўляецца перашкодай для мігрантаў", - лічыць міністр.
Рыжанкоў мяркуе, што камусьці цікава апрыходаваць гэты бюджэт. Ён канстатаваў, што Польшча стварае "новую жалезную заслону".
"Як наш прэзідэнт любіць гаварыць, калі выдзяляюцца такія вялікія грошы, незразумела на што і незразумела, для чаго, то чакайце нейкіх карупцыйных чарговых скандалаў", - рэзюміраваў кіраўнік МЗС.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
