Шэсць інаўгурацый Аляксандра Лукашэнкі – архіўныя фота

Першая інаўгурацыя адбылася ў Авальнай зале Дома ўрада 20 ліпеня 1994 года. Прысягу Аляксандр Лукашэнка прынёс па-беларуску, а з інаўгурацыйнай прамовай выступіў па-руску.

Другая цырымонія ўступлення кіраўніка дзяржавы на пасаду адбылася 20 верасня 2001 года ў Палацы Рэспублікі – ужо з новымі дзяржаўнымі сімваламі.

Пасля падпісання акта аб прынясенні прысягі і ўручэння Аляксандру Лукашэнку адпаведнага пасведчання ўрачыстая цырымонія працягнулася на Кастрычніцкай плошчы.

Трэцяя інаўгурацыя прайшла 8 красавіка 2006 года – таксама ў Палацы Рэспублікі.

На цырымоніі інаўгурацыі ў Палацы Рэспублікі прысутнічалі звыш 2 600 запрошаных: вышэйшыя службовыя асобы краіны, дэпутаты Палаты прадстаўнікоў і члены Савета Рэспублікі Нацыянальнага сходу, суддзі Канстытуцыйнага, Вярхоўнага і Вышэйшага гаспадарчага судоў, члены ўрада, кіраўнікі рэспубліканскіх органаў, лідары палітычных партый, прадстаўнікі грамадскіх і рэлігійных аб’яднанняў, дзеячы навукі, культуры, мастацтва, замежныя госці, кіраўнікі дыпламатычных прадстаўніцтваў, акрэдытаваныя ў Беларусі.

На цырымонію прынясення прысягі вайскоўцамі Аляксандр Лукашэнка выйшаў у мундзіры Вярхоўнага галоўнакамандуючага.

На чацвёртую па ліку ўрачыстую цырымонію, якая адбылася 21 студзеня 2011 года, кіраўнік дзяржавы прыбыў да Палаца Рэспублікі ў суправаджэнні ганаровага эскорту з 9 матацыклістаў.

Пад гукі фанфар Аляксандр Лукашэнка прайшоў у Вялікую залу і падняўся на сцэну, дзе таксама знаходзіліся старшыня Савета Рэспублікі Нацыянальнага сходу Беларусі Анатоль Рубінаў, старшыня Палаты прадстаўнікоў Нацыянальнага сходу Уладзімір Андрэйчанка, старшыня Канстытуцыйнага суда Пётр Міклашэвіч, старшыня Цэнтральнай камісіі па выбарах і правядзенні рэспубліканскіх рэферэндумаў Лідзія Ярмошына, мітрапаліт Мінскі і Слуцкі Філарэт, патрыяршы экзарх усяе Беларусі.

Цырымонія падпісання акта прысягі трансліравалася па ўсіх нацыянальных тэлеканалах Беларусі, а таксама па TV-экранах, размешчаных на Кастрычніцкай плошчы і плошчы Незалежнасці.

Пятая інаўгурацыя кіраўніка дзяржавы прайшла 6 лістапада 2015 года – упершыню ў Палацы Незалежнасці.

Пасведчанне прэзідэнта кіраўніку дзяржавы ўручана ў прысутнасці больш за тысячу запрошаных, сярод якіх вышэйшыя службовыя асобы краіны, дэпутаты Палаты прадстаўнікоў і члены Савета Рэспублікі Нацыянальнага сходу, кіраўнікі розных узроўняў, прадстаўнікі дыпламатычнага корпуса, замежныя госці.

На інаўгурацыі прысутнічалі родныя і блізкія прэзідэнта.

Потым урачыстыя мерапрыемствы перамясціліся на плошчу Дзяржаўнага сцяга Рэспублікі Беларусь.

Шостая цырымонія інаўгурацыі адбылася 23 верасня 2020 года ў Палацы Незалежнасці.

На ўрачыстасці было запрошана каля сямісот чалавек.

Аляксандр Лукашэнка зноў прынёс прысягу на беларускай мове.

Пасля падпісання акта аб прынясенні прысягі старшыня Цэнтральнай камісіі Беларусі па выбарах і правядзенні рэспубліканскіх рэферэндумаў Лідзія Ярмошына ўручыла яму пасведчанне прэзідэнта Рэспублікі Беларусь.

У 2020 годзе прамова Аляксандра Лукашэнкі перад вайскоўцамі была асабліва эмацыянальнай: "Зразумейце, рабяты, гэта не кожны беларус, на жаль, сёння разумее. Але вельмі хутка зразумее. Гэта – наша праца. Мы павінны былі зрабіць гэтую працу. І мы яе зрабілі. Нас спрабавалі на трываласць, спрабавалі распаліць варожасць і нянавісць, падзяліць краіну і пасеяць хаос. Не выйшла і не выйдзе!"