Шчыты, "калючка" і самы няўдачлівы аўтобус: Польшча закрыла мяжу з Беларуссю
10:09 12.09.2025 (абноўлена: 10:46 12.09.2025)
© Sputnik / Виктор Толочко
Падпісацца
Эксклюзіў
Варшава ноччу ў пятніцу закрыла польска-беларускую мяжу. Цяпер, каб трапіць у краіны Еўрасаюза, трэба ехаць у пункты пропуску на літоўскім і латвійскім кірунку. Гэта стварае вялікія нязручнасці, бо давядзецца рабіць вялікі крук.
Інфармацыя аб закрыцці Польшчай мяжы з Беларуссю застала многіх знянацку, бо камусьці трэба было ехаць у Беларусь па справах, а хтосьці вяртаўся на працу ў Польшчу ці збіраўся адпачыць у Еўропе. Планы раптоўна пайшлі пад адхон.
Пункт пропуску "Брэст" (з польскага боку "Цярэспаль") быў самым папулярным і загружаным маршрутам. Прапускная здольнасць добрая – 3,4 тыс аўто ў суткі ў абодвух кірунках.
Закрыццё беларуска-польскай мяжы
© Sputnik / Виктор Толочко
Аднак польскі бок і раней працаваць не спяшаўся, з-за чаго на гэтым напрамку ўвесь час былі вялікія чэргі. Перад закрыццём мяжы з Беларуссю палякі таксама не праявілі асаблівай стараннасці. Як вынік – некаторыя аўтобусы не паспелі праехаць "Варшаўскі мост" да прызначанага часу. Ім прыйшлося вярнуцца назад у Беларусь.
Sputnik наведаў пункт пропуску "Брэст" і паглядзеў, як палякі закрывалі мяжу.
Едуць толькі рызыковыя
Вялікія чэргі з аўтобусаў, якія назіраліся ў чацвер днём і ўвечары, за некалькі гадзін да аб’яўленага Варшавай закрыцця зніклі. Увечары засталіся самыя адчайныя, але і ў іх часам здавалі нервы. Яно і зразумела: доўгае чаканне па некалькі сутак у чэргах. А тут яшчэ дадаецца і невядомасць – прапусцяць ці не.
© Sputnik / Виктор Толочко
Каля 23:30 у "Брэсце" людзі, якія прыбылі з польскага боку, распавялі, што там "нейкая актывізацыя вайскоўцаў". Гэта пацвердзіла і Наталля Барысаўна, якая вярталася з Германіі транзітам праз Польшчу. Яна расказала аб абстаноўцы "з таго боку".
"Калі ехалі ў "Цярэспалі", бачылі рух нейкіх ваенных машын. Не здзіўлюся, калі яны настолькі звар’яцелі і прыгналі вадамёт", - эмацыянальна дзеліцца яна.
Цяпер Наталлі Барысаўне давядзецца ехаць дадому ў Віцебск. Галоўнае, прызнаецца пасажырка, што яна на беларускім баку і паспела вярнуцца да таго, як мяжу закрылі.
У 00:35 частка аўтобусаў у "Брэсце" накіроўвалася да "Варшаўскага моста" зусім пустымі.
Дзяніс – кіроўца аднаго з іх. Ён прызнаецца, у гэтым няма нічога дзіўнага: людзі стаміліся і вырашылі: "З нас хопіць".
"У мяне мала пасажыраў было, а астатнім проста надакучыла чакаць і яны сышлі", - распавёў ён.
Дзянісу трэба будзе вярнуць аўтобус работадаўцу
© Sputnik / Александр Жибуль
Дзяніс працуе на польскую кампанію, яму трэба вярнуць аўтобус работадаўцу. Ён сам з тых хлопцаў, якія імкнуліся "заскочыць у апошні вагон". Зараз давядзецца рабіць вялікі крук праз іншыя пункты пропуску Беларусі і краін ЕС – такая праца. Што сапраўды яго турбуе – верагоднасць страціць працу.
"Калі маршрут перакрыецца, то мы губляем працу. А дзе мы працаваць будзем?" - задае рытарычнае пытанне Дзяніс.
"Калючка" і шчыты: як закрывалі мяжу
Час ляціць хутка, і вось на гадзінніку настала ўжо гадзіна "Ч" – 01:00 (00:00 польскі час). Журналісты назіралі за польскімі пагранічнікамі проста на "Варшаўскім мосце" за дзясятак метраў ад іх. Але ў прызначаны час нічога не адбылося.
© Sputnik / Виктор Толочко
"Вартавыя мяжы" прыкметна нерваваліся з-за празмернай увагі, з кімсьці раіліся. Да іх падышло падмацаванне з аўтаматамі, у бронекамізэльках і касках.
Мабыць, у 01:15 па мінскім часе (00:15 па польскім) паступіла каманда, і на мосце пачалася ўстаноўка "калючкі", следам – металічных шчытоў. Цяпер ужо сапраўды не мінуць і не праехаць.
© Sputnik / Виктор Толочко
Аўтобусы, якія стаялі на беларускім баку, проста перад інжынернымі збудаваннямі, вымушаны былі здаваць заднім ходам, бо развярнуцца не дазваляе шырыня праезнай часткі на нейтральнай паласе. Крыўдна вось так вяртацца назад пасля праведзенага шляху і працяглага чакання ў чарзе.
Сяргей стаяў у чарзе на мяжы амаль два дні
© Sputnik / Александр Жибуль
Аўтобус Сяргея накіроўваўся ў Кёльн і стаяў у чарзе на выезд з Беларусі амаль два дні. Але вадзіцелю і пасажырам не пашанцавала з перасячэннем мяжы – палякі закрылі шлагбаум перад аўтобусам, не даўшы яму праехаць.
"Не пусцілі нас палякі і ўсё. Перад намі шлагбаум – і заднім ходам вярнуліся сюды (у Беларусь - Sputnik). Дрэнна вельмі, у нас было яшчэ 40 хвілін, чаму не пусцілі нас, не зразумела. Маглі ж праехаць", - наракае Сяргей.
Пасажыр аўтобуса Станіслаў таксама нешматслоўны, яно і зразумела: доўгае чаканне і расчараванне ад таго, што праехаць мяжу не ўдалося.
"Двое сутак у аўтобусе. Які настрой? Абсалютна ніякага", - эмацыянальна дзеліцца ён.
Маргарыта з гэтага ж аўтобуса пакуль не ведае, што рабіць далей. Ці вяртацца ў Смаленск, дзе яна жыве, ці спрабаваць выехаць за мяжу праз Літву ці Латвію.
Маргарыта вяртаецца з мяжы ў Мінск
© Sputnik / Александр Жибуль
"Пакуль... будзе дарога ў Мінск, там трэба купіць білет дадому або зняць гасцініцу. Гэта ўсё звязана з пэўнымі цяжкасцямі. Калі б не некаторыя абставіны, то мы б спакойна прайшлі мяжу. Наш аўтобус прапускаў усіх, каго толькі можна. Гэта залежыць ад вадзіцеля. Што зараз рабіць? Проста паедзем у Мінск", - са шкадаваннем гаворыць яна.
Лагістыку давядзецца перабудаваць
Афіцыйны прадстаўнік Дзяржпагранкамітэта Антон Бычкоўскі адзначыў, што падарожнікам пасля закрыцця пагранпераходу з польскага боку, давядзецца перабудаваць лагістыку.
"Многім іншаземцам, а таксама грамадзянам Рэспублікі Беларусь цяпер давядзецца перагледзець свае планы па паездках на тэрыторыю ЕС, не толькі ў Польшчу, але і ў іншыя краіны, напэўна, у людзей прапалі білеты на стыковачныя рэйсы, якія маглі быць арганізаваны з Варшавы і іншых аэрапортаў сумежнай дзяржавы", - сказаў ён.
Бычкоўскі звярнуў увагу на тое, што ў сувязі з закрыццём аўтадарожнага пункта пропуску "Брэст" застаецца няшмат варыянтаў перасячэння мяжы з Беларусі ў краіны Еўрапейскага саюза.
Афіцыйны прадстаўнік Дзяржпагранкамітэта Антон Бычкоўскі
© Sputnik / Виктор Толочко
На літоўскім напрамку – гэта пункт пропуску "Каменны Лог" і "Беняконі", на мяжы з Латвіяй – "Грыгароўшчына". Акрамя таго, ёсць магчымасць вылецець праз трэція краіны з Нацыянальнага аэрапорта Мінск рэйсамі, якія ідуць за межы Беларусі.
Ён запэўніў, што беларускія пункты пропуску на мяжы з Польшчай прадоўжаць работу. А тры пункты пропуску, якія засталіся, на мяжы Беларусі і краін ЕС гатовы да павелічэння транспартнага патоку.
Наўрад ці адкрыюць
На беларуска-польскую мяжу ў "Брэст" прыехаў і кіраўнік фонду "Польская праўда" Томаш Шміт. Ён назваў "канкрэтным трызненнем" рашэнне Польшчы закрыць мяжу з-за беларуска-расійскіх вучэнняў "Захад".
"Звычайныя людзі, турысты, напрыклад, якія прыязджаюць з сям’ёй, з дзецьмі, каб сустрэцца. Як яны звязаны з вучэннямі "Захад"? Логікі ў гэтым рашэнні няма. Польская ўлада проста хоча абвастрэння адносін паміж Польшчай і Беларуссю", - лічыць ён.
Кіраўнік фонду звярнуў увагу на тое, што ўжо даўно вядома аб тым, што Беларусь перанесла ўглыб краіны вучэнні "Захад", каб знізіць градус напружання ў рэгіёне. Паводле яго слоў, Варшава шукала прычыну, за якую можна ўчапіцца, і знайшла. Гэта робіцца для таго, каб атрымліваць ад ЕС больш грошай на ваенную тэхніку.
Скептычна Шміт ставіцца і да таго, што пасля манеўраў Польшча адкрые мяжу.
"Гэта пад вялікім пытаннем. Невялікі шанс, што яна адкрыецца. Магчыма, адкрыюць чыгунку (чыгуначныя пункты пропуску - Sputnik), па якіх у ЕС возяць кітайскія тавары, а для звычайных людзей, верагодна, мяжа ўжо будзе закрыта", - дадаў ён.
Сітуацыя напальваецца і адбіваецца яна ў першую чаргу на мяжы – калючы дрот і шчыты красамоўн зараз гавораць пра адносіны Польшчы да Беларусі.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
