Дзве краіны – адна гісторыя: здымкі фільма пра Бацьку Міная завяршыліся пад Мінскам
© Виктор Толочко
Падпісацца
Прэм’ера гістарычнай карціны запланавана на 3 ліпеня 2026 года, у Дзень Незалежнасці Рэспублікі Беларусь. Рэжысёр і акцёры фільма падзяліліся ўражаннямі ад удзелу ў гістарычным беларуска-расійскім праекце.
Атмасфера ваеннага ліхалецця лунае на натурнай пляцоўцы "Беларусьфільма". Тут здымаюць фінальныя сцэны стужкі "Бацька Мінай. Партызанская легенда". Sputnik пабываў на фінальных здымках маштабнага беларуска-расійскага праекта, дзе кожны кадр – гэта пошук балансу паміж праўдай гісторыі і майстэрствам кінематографа.
Фільм "Бацька Мінай. Партызанская легенда" расказвае пра лёс легендарнага партызанскага камандзіра часоў Вялікай Айчыннай вайны, Героя Савецкага Саюза Міная Піліпавіча Шмырова, вядомага пад псеўданімам Бацька Мінай. Здымкі фільма стартавалі ў жніўні 2025 года і завяршаюцца ў Беларусі – застанецца зняць толькі некалькі дадатковых эпізодаў у Расіі.
Дарагое і роднае месца
У апошні здымачны дзень на натурнай пляцоўцы "Беларусьфільма" на ўсю моц ішла работа. Сцэны карціны "Бацька Мінай. Партызанская легенда" здымаліся пад асаблівай увагай работнікаў здымачнай пляцоўкі. Пад кантролем здымачнай групы была кожная дэталь: ад касцюмаў да штучнага снегу, які ляжаў на праезнай зямлі – свайго ў гэты дзень не аказалася.
Здымкі фільма "Бацька Мінай. Партызанская легенда"
© Sputnik / Виктор Толочко
Самым папулярным словам на пляцоўцы было "Цішыня!", і нават шолах травы пад нагамі быў у стане парушыць творчы працэс.
"Сёння здымаецца важная сцэна, калі партызаны сустракаюцца з вясковымі людзьмі, якія вырашылі пайсці ў партызанскія лясы і супраціўляцца фашыстам. У гэтай сцэне Бацька Мінай, Аляксей Краўчанка (акцёр. - Sputnik), у санях, аброслы пасля цяжкай хваробы і страты дзяцей. Яго прывозяць у партызанскі лагер", - распавёў карэспандэнту Sputnik рэжысёр фільма Ігар Угольнікаў.
Ён паведаміў, што ў другой палове дня запланавана здымка фінальнай сцэны фільма – калі партызанская брыгада пойдзе на барацьбу з фашыстамі.
Рэжысёр фільма "Бацька Мінай. Партызанская легенда" Ігар Угольнікаў
© Sputnik / Виктор Толочко
Ігар Угольнікаў таксама падзяліўся ўражаннямі аб здымках гістарычных сцэн на натурнай пляцоўцы ў Беларусі, прызнаўшыся, што развітвацца з праектам нялёгка.
"Сёння апошні дзень. І калі шчыра, я тут ужо ў Смалявічах хаджу і сумую. Таму што за ўвесь гэты час, пачынаючы са жніўня месяца, а да гэтага з падрыхтоўкі, гэта стала ўжо для мяне такім, ведаеце, дарагім і родным месцам. І, уласна, не толькі для мяне, але і для ўсёй здымачнай групы", - адзначыў рэжысёр.
Адказны праект
Галоўную ролю ў фільме пра Бацьку Міная сыграў народны артыст Расіі Аляксей Краўчанка. Сваю першую гучную ролю Краўчанка выканаў у 13 гадоў у драме Элема Клімава "Ідзі і глядзі" тут жа, на "Беларусьфільме". І вось зараз вярнуўся. Зноў Беларусь і зноў кіно пра Вялікую Айчынную вайну.
Расійскі акцёр Аляксей Краўчанка ў ролі партызана Бацькі Міная
© Sputnik / Виктор Толочко
Падчас невялікага перапынку акцёр распавёў, што знаходзіцца пад вялізным уражаннем ад здымачнага працэсу і назваў кінакарціну складанай працай.
"Уражанні самыя-самыя выдатныя. Так, складаная праца. Праца не бывае лёгкай, але так ці інакш для мяне Бацька Мінай – максімальна складаны праект. І ён адказны, таму што гэта сапраўдны чалавек, гэта легенда. Гэта было па-сапраўднаму. Як гэта сыграць – застаецца пытаннем. Так ці інакш, вялікая частка працы зроблена", - падзяліўся ўражаннямі Краўчанка.
Асаблівую ўвагу народны артыст Расіі ўдзяліў акцёрскай ігры дзяцей у кінакарціне.
"Цудоўная група, цудоўныя партнёры. Дзякуй Богу. Дзеці – боскія проста. Я заўсёды гавару: яны не іграюць, яны жывуць у кадры, і яны гэта робяць так бесклапотна. Пабольш бы такіх дзяцей было ў кіно", - дадаў ён.
Кожны акцёр, які дакрануўся да гісторыі Бацькі Міная, па-свойму пражывае гэтую трагічную старонку мінулага. Вядомы беларускі акцёр тэатра і кіно Аляксандр Абрамовіч, які выконвае ў фільме ролю персанажа па прозвішчы Ігнатовіч, расказаў пра агульнае для многіх акцёраў ваенна-гістарычных карцін пачуццё абавязку перад памяццю герояў і пра жаданне максімальна сумленна і паважліва расказаць іх гісторыю.
Акцёр тэатра і кіно Аляксандр Абрамовіч
© Sputnik / Виктор Толочко
"Тое, што мы можам зрабіць для гэтых людзей, мы робім з задавальненнем. Таму што мы ніколі не зможам папоўніць і неяк загладзіць тое, колькі людзей загінула. Для нас гэта ўсё вельмі блізка", - сказаў Абрамовіч.
Прырода і спецэфекты
Для здымак фільма выбралі маляўнічае месца: вясковыя вулачкі, бераг возера, дрэвы, якія нахіліліся да дарогі – усё дапамагала пагрузіцца ў атмасферу ваеннага ліхалецця.
Натурная пляцоўка "Беларусьфільма"
© Sputnik / Виктор Толочко
Як адзначыла крэатыўны прадзюсер і па сумяшчальніцтве актрыса фільма Алена Дуброўская, на натуральнай пляцоўцы "Беларусьфільма" была знята большая частка кінакарціны.
Крэатыўны прадзюсар Алена Дуброўская
© Sputnik / Виктор Толочко
"Усё жыццё вёскі можна здымаць тут. Будаваць дэкарацыі, інтэр’еры", - заўважыла яна.
Асаблівым успамінам, паводле слоў Дуброўскай, для яе сталі дні, калі ў канцы лістапада ў Беларусі пайшоў снег. Тады атрымалася зняць вельмі эмацыянальныя сцэны з вялікай дакладнасцю.
"Нам пашанцавала. 24 лістапада проста, напэўна, мы вымалілі гэты снег. 23-24 у нас былі змены і вось тут, дзе мы зараз з вамі знаходзімся, мы здымалі сцэну расстрэлу дзяцей Міная з сапраўдным снегам", - успамінае крэатыўны прадзюсар.
У астатнія ж дні, над "заснежанымі" вуліцамі старанна працавалі піратэхнікі. У апошні здымачны дзень у Беларусі на здымачнай пляцоўцы былі задзейнічаны пяць чалавек. Піратэхнік Ігар Цярэшын расказаў нюансы мастацтва стварэння зімы ў любую пару года.
Штучны снег на здымачнай пляцоўцы
© Sputnik / Виктор Толочко
"У нас стаіць задача зрабіць зіму з "лета". Проста зрабіць шмат снегу, калі яго няма. Ужо прыкладна 100 кг (штучнага снегу. - Sputnik.) сышло на дэкарацыю вось гэтай дарогі адной. Яшчэ шмат плануеццаа задэкарыраваць. Вось усяго снегу мы, па-мойму, каля 500 або 600 ег прывезлі", - паведаміў Цярэшын.
Штучны снег размяшчаецца па пляцоўцы строга так, як скажуць рэжысёр або аператар – каб дабіцца патрэбнай атмасферы ў кадры. Адной задэкарыраванай лакацыі хапае на пару дубляў. І гэтыя намаганні – толькі некаторыя з дапаможных элементаў для стварэння маштабнай і гістарычна дакладнай карціны.
Рэквізіт для здымак фільма
© Sputnik / Виктор Толочко
Адзіны кінаансамбль
Пачуццё згуртаванасці і агульнасці, аб якім казаў акцёр Аляксей Краўчанка, стала галоўным творчым вынікам маштабнага праекта. З ім згодзен і рэжысёр фільма Ігар Угольнікаў, які асобна спыніўся на поспеху сумеснай працы дзвюх краін.
Акцёры масоўкі на здымках фільма
© Sputnik / Виктор Толочко
"Нам удалося сабраць расійска-беларускую здымачную групу. Цяпер гэта адзінае цэлае. Я вельмі задаволены беларускімі акцёрамі. Няма ніякай розніцы паміж расійскімі і беларускімі акцёрамі. Гэта ўжо адзіны ансамбль", - адзначыў рэжысёр.
Біяграфічны фільм "Бацька Мінай. Партызанская легенда" – гэта сумесны праект расійскага "Военфильма" і "Беларусьфільма". Супрацоўніцтва дзвюх кінастудый над гэтым праектам зараджае на поспех, асабліва дзякуючы цудоўнаму выбару акцёрскага складу.
"Ведаеце, цяпер можна гаварыць аб тым, што "Беларусьфільм" разам з "Военфильма" можа здымаць любыя фільмы. Мы аб’ядналі намаганні, зрасліся дзвюма студыямі і наш вопыт, я думаю, будзе прыдатны ў далейшым для таго, каб мы змаглі ствараць сумесныя карціны нашых студый", - адзначыў Ігар Угольнікаў.
Здымачная група фільма
© Sputnik / Виктор Толочко
Рэжысёр падзякаваў беларуска-расійскай здымачнай групе за прафесіяналізм і выказаў надзею, што фільм удасца скончыць у тэрмін.
Прэм’ера фільма запланавана на 3 ліпеня 2026 года, у Дзень Незалежнасці Рэспублікі Беларусь.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
