ГРОДНА, 11 сту — Sputnik, Іна Грышук. Незвычайная аб'ява з прапановай стаць унукам на гадзіну і дапамагаць пенсіянерам вырашаць дробныя бытавыя справы за пагадзінную плату з'явілася ў Гродне. Да гэтага ў абласным цэнтры былі паслугі толькі "жонак" і "мужоў" на гадзіну.
Аўтар аб'явы гатовы падфарбаваць, перасунуць, ускапаць, скасіць, адрамантаваць і многае іншае. Працаваць гатовы да поўначы.
Стаць часовым унукам, які гатоў выканаць любую просьбу пажылых людзей, вырашыў 33-гадовы Андрэй. Мужчына распавёў, што хоча дапамагаць пажылым людзям.
"У многіх пенсіянераў няма дзяцей і ўнукаў, у іншых дзеці ці ўнукі не прыходзяць дапамагаць. Вось я і вырашыў, што буду рабіць гэтую працу. Я сам не гродзенец, нядаўна з вёскі прыехаў, карані даюць аб сабе ведаць", — распавёў мужчына.
Ён таксама дадаў, што вопыт працы ўнукам ёсць, таму што ў родных бабуль і дзядуль ён на добрым рахунку.
Наколькі папулярная паслуга "ўнука на час", пакуль складана сказаць. Таму што да Андрэя пакуль не паступіла ні аднаго заказу. Ён гэта тлумачыць тым, што зарэгістраваўся ў падатковай усяго пару дзён таму, кліенты яшчэ не паспелі ўбачыць аб'яву або патэлефанаваць.