Звычайна спаборніцтвы такога рангу не вельмі прыцягваюць да сябе ўвагу, паколькі сталіца ўжо распешчаная турнірамі высокага міжнароднага ўзроўню. Аднак Беларуская федэрацыя шахмат на чале з Анастасіяй Сарокінай зрабіла арыгінальны ход: чэмпіянат арганізавалі ў адной з залаў Нацыянальнага гістарычнага музея.
Цырымонію адкрыцця наведала нямала VIP-персон: першы намеснік кіраўніка Адміністрацыі Прэзідэнта, старшыня Беларускай федэрацыі баскетбола Максім Рыжанкоў, дэпутат Палаты прадстаўнікоў Нацыянальнага сходу, старшыня Беларускай федэрацыі лёгкай атлетыкі Вадзім Дзевятоўскі, першы намеснік міністра спорту і турызму Вячаслаў Дурноў, Надзвычайны і Паўнамоцны Пасол Злучанага Каралеўства Вялікабрытаніі і Паўночнай Ірландыі ў Беларусі Фіёна Гіб.
Сцены залы ўпрыгожылі карціны беларускіх мастакоў — Марты Шматовай, Рыгора Іванова, Алены Шлегель і Анастасіі Балыш. А за шклом размясціліся ўнікальныя шахматы, у тым ліку падарункі прэзідэнту Рэспублікі Беларусь Аляксандру Лукашэнку.
Цырымонія адкрыцця чэмпіянату, а таксама лёсаванне ўдзельнікаў атрымаліся ўрачыстымі, узвышанымі, арыгінальнымі і прыгожымі.
У спаборніцтвах прымаюць удзел 24 лепшыя шахматысты Беларусі (12 мужчын і 12 жанчын). Чэмпіянат завершыцца 28 студзеня.
Анастасія Сарокіна прызналася, што вясной у Мінск прыедзе адзін з славутых шахматыстаў свету, каб правесці сеанс адначасовай гульні. Хто гэта будзе і ў якім незвычайным месцы адбудзецца сустрэча з паважаным госцем, старшыня федэрацыі пакуль вырашыла не казаць, захоўваючы інтрыгу.