МІНСК, 2 сак — Sputnik. Пры арганізацыі правядзення II Еўрапейскіх гульняў у Беларусі стаіць задача не дапусціць неабгрунтаваных расходаў, заявіў дырэктар фонду "Дырэкцыя II Еўрапейскіх гульняў 2019 года" Георгій Катулін.
Напярэдадні з візітам у Мінск прыбыў кіраўнік Еўрапейскіх алімпійскіх камітэтаў (ЕАК) Янэз Качыянчыч для ўдзелу ў Каардынацыйнай камісіі ЕАК. 2-3 сакавіка ў штаб-кватэры НАК пройдуць сустрэчы з кіруючым складам і мэнэджэрамі дырэкцыі Еўрапейскіх гульняў-2019.
"Стаіць задача эканоміць бюджэт і не дапускаць неабгрунтаваных расходаў. Таму многія рэчы былі выкарыстаныя на часовых умовах і ўмовах арэнды. Гэта будзе тэхналагічна і апраўдана. Як прыклад, гэта павільён для харчавання спартсменаў, кантрольна-прапускныя пункты для ўваходу на аб'екты, бытавыя збудаванні для працоўнай сілы", — сказаў Катулін журналістам у пятніцу.
У якасці прыкладу дырэктар фонду прывёў Алімпійскія гульні 2018 года ў Пхенчхане, дзе была "дастатковая колькасць часовых збудаванняў".
"Мы зараз уступаем у вельмі сур'ёзны перыяд тэхнічнай экспертызы ў адпаведнасці з патрабаваннямі еўрапейскіх федэрацый па арганізацыі спорту. І на падставе гэтага будзе створаны свой праект выкарыстання дзеючых і часовых збудаванняў", — працягнуў Катулін.
Ён дадаў, што стан асноўных аб'ектаў Еўрапейскіх гульняў — "Мінск-Арэны", "Чыжоўка-Арэны" і Палаца спорту — не стаў горшы. "Але не трэба забываць, што ў нас велізарны досвед правядзення спаборніцтваў па асобных відах спорту, мы зараз арганізуем комплекснае мерапрыемства, і ўсе аб'екты і службы будуць аб'яднаныя ў адзінае цэлае", — сказаў на заканчэнне Катулін.
Раней паведамлялася, што на правядзенне Еўрапейскіх гульняў Беларусь гатовая выдаткаваць не больш за 40 мільёнаў долараў (нагадаем, афіцыйны бюджэт першых Еўрапейскіх гульняў у Баку склаў больш за мільярд долараў). Прэзідэнт Беларусі Аляксандр Лукашэнка паставіў задачу, каб "спаборніцтвы былі добрымі і душэўнымі", а спартсмены адчувалі сябе ў Мінску ідэальна.
Еўрапейскія гульні — 2019 пройдуць у Мінску з 21 па 30 чэрвеня 2019 года. У праграме спаборніцтваў — 15 відаў спорту.
Міжнароднае інфармацыйнае агенцтва і радыё Sputnik з'яўляецца інфармацыйным партнёрам Еўрапейскіх гульняў-2019.