МІНСК, 26 сак – Sputnik. Мабільнае прылажэнне "Дапамога побач", створанае беларускім МНС, спампавалі і ўстанавілі больш за 100 тысяч карыстальнікаў Android, пра гэта паведамляецца на сайце МНС.
"Цяпер пра гэта сігналізуе спецыяльны значок у краме прыкладанняў Google Play Market", — адзначылі ў міністэрстве.
Прылажэнне было створана беларускімі ратавальнікамі ў 2016 годзе. За гэты час яно набрала болей 1,5 тысяч станоўчых водгукаў.
У праграме прадугледжана апавяшчэнне аб неспрыяльных і небяспечных з'явах, напрыклад, карыстальнікі атрымліваюць паведамленні, заснаваныя на штармавых папярэджаннях Гідраметэацэнтра. Таксама ў прылажэнні даступна кнопка званка ў МНС "112", але можна патэлефанаваць не толькі ў МНС, але і ў бальніцу або родным ці адправіць СМС на зададзены нумар.
У раздзеле "Правер сябе" карыстальнікі могуць прайсці 13 тэстаў на розныя тэмы, каб праверыць, ці ведаюць яны, як сябе паводзіць у складаных сітуацыях.