МІНСК, 13 мая — Sputnik. Каля галоўнага ўваходу Цэнтральнага батанічнага саду НАН Беларусі ў суботу з'явілася чарга: такі ажыятаж выклікала не толькі цёплае надвор'е, але і магчымасць убачыць бэзавы сад у квітненні.
Тыдзень бэзу праходзіць з 12 па 20 мая, а кульмінацыяй гэтага пахучага свята стане культурна-асветніцкае мерапрыемства "Бэзавыя мроі", якое адбудзецца праз тыдзень. Сірынгарый знаходзіцца побач з аранжарэяй, каб туды трапіць, трэба ісці па цэнтральнай алеі і каля альтанкі згарнуць направа.
Шмат гараджан прыходзілі з сем'ямі і з радасцю фатаграфаваліся на фоне квітнеючых кустоў. Больш за ўсё захаплення было ў дзяцей, якія з уласцівым ім энтузіязмам хапалі галінкі і ўдыхалі пах кветак.
Бэзавы водар таксама прыцягнуў рамантычныя парачкі і мадэляў з фатографамі. Здаецца, сёння наведвальнікамі былі зробленыя тысячы сэлф і прафесійных фота.
У батанічным садзе гавораць, што бэз пачынае квітнець нераўнамерна і кожны гатунак распускаецца ў свой час. Таму ўсіх, хто не зможа прыйсці на гэтых выхадных, чакаюць на наступныя.