МІНСК, 16 мая — Sputnik. Расія зрабіла каласальную працу па падрыхтоўцы Чэмпіянату свету па футболе 2018, заявіла старшыня Савета Федэрацыі РФ Валянціна Мацвіенка ў інтэрв'ю агенцтву РІА "Новости".
Сусветнае першынство ўпершыню ў гісторыі пройдзе ў Расіі. З 14 чэрвеня па 15 ліпеня матчы прымуць 11 гарадоў краіны: Масква, Калінінград, Санкт-Пецярбург, Валгаград, Казань, Ніжні Ноўгарад, Самара, Саранск, Растоў-на-Доне, Сочы і Екацярынбург.
Па словах Валянціны Мацвіенка, спецыяльна да турніру былі пабудаваны новыя стадыёны, спартыўныя аб'екты, праведзена добраўпарадкаванне гарадоў.
"Вядома, першапачаткова гэта было зроблена для чэмпіянату, але галоўнае — гэта зроблена для нашых грамадзян: каб яны жылі ў камфортным асяроддзі, каб у нас з'явіліся новыя спартыўныя аб'екты, каб у нас развіваўся спорт і прапагандаваўся здаровы лад жыцця. І нам гэта ўдалося. Мы ўдастоены найвышэйшых адзнак FIFA і тых, хто да нас прыязджае, знаёміцца з гатоўнасцю да правядзення чэмпіянату, самых захопленых водгукаў", — адзначыла суразмоўца РІА "Новости".
Таксама яна сказала, што ў Расіі будуць рады "і палітыкам, і грамадскім, дзяржаўным дзеячам, якія прыедуць на чэмпіянат". Мацвіенка падкрэсліла, што ні ў якой меры нельга палітыку прыўносіць у спорт — "гэта несумленна, гэта не па-спартыўнаму".
"А тыя, хто лічыць па-іншаму, хай яны лепш застаюцца дома. Я ўпэўнена, што чэмпіянат стане ўзрушаючым святам спорту. Мы ўсе з нецярпеннем, вядома, чакаем яго", — сказала старшыня Савета Федэрацыі РФ.
Акрамя таго, Мацвіенка прызналася, што збіраецца наведаць матчы ЧС, хоць і не з'яўляецца "такім ужо фанатам футбола".
"Я буду на адкрыцці, наведаю адзін з паўфіналаў у маім любімым горадзе — Пецярбургу — на "Зеніт-арэне", — распавяла суразмоўца агенцтва.
Па словах Мацвіенка, яна асабліва заўзее за "Зеніт" і, калі не атрымліваецца трапіць на стадыён, глядзіць матчы каманды па тэлевізары.
"Мне вельмі хочацца пажадаць нашай камандзе перамогі, мне хочацца пажадаць усім выдатных новых рэкордаў, выдатных галоў і ўсім добрага настрою", — сказала на заканчэнне Мацвіенка.