МІНСК, 31 мая — Sputnik. Вядомы брытанскі гісторык і пісьменнік Энтані Бівор апублікаваў у The Guardian спіс найгоршых гістарычных фільмаў.
У сваім артыкуле Бівор выказаў абурэнне з нагоды таго, наколькі зняважліва стваральнікі сучасных фільмаў ставяцца да гістарычнай падаплёкі кінастужак.
На яго думку, найгоршыя з пункту гледжання гістарычнай дакладнасці фільмы — "Дзюнкерк", "Патрыёт", "Выратаваць радавога Раяна", "Цёмныя часы" і "Вораг каля варотаў".
Аўтар разнёс у пух і прах гістарычную дакладнасць гэтых фільмаў — так, ён настойвае, што ў "Дзюнкерку" не атрымалася нават прыблізна паказаць маштаб баявых дзеянняў, а ў "Цёмных часах" персанажы наогул знаходзяцца ў бункерах у той час, калі Лондан яшчэ не бамбілі.
Па словах гісторыка, яго жонка ніколі не глядзіць з ім гістарычныя фільмы з-за шквалу рэмарак аб неадпаведнасцях, якія ён увесь час агучвае.
У лічаныя гадзіны карыстальнікі сеткі сталі масава дзяліцца артыкулам, а да няўдалых, хоць і дакладных фільмаў прапанавалі дадаць вядомы савецкі фільм "Ідзі і глядзі" як адзін з самых страшных і шакіруючых фільмаў пра Другую сусветную вайну ў гісторыі.
Нагадаем, фільм "Ідзі і глядзі" ўваходзіць у сусветны спіс "50 лепшых ваенных фільмаў усіх часоў", да 75-годдзя хатынскай трагедыі кінакарціна была адрэстаўраваная і аблічбаваная.