МІНСК, 27 ліп — Sputnik. Самая тытулаваная біятланістка Беларусі Дар'я Домрачава і яе муж — самы тытулаваны біятланіст ў свеце Уле-Эйнар Б'ёрндален — пабывалі з экскурсіяй на заводзе БелАЗ у Жодзіна, пра гэта распавялі ў прэс-службе прадпрыемства.
БелАЗ стаў чарговым пунктам у спісе цікавых месцаў, якія Дар'я Домрачава хацела паказаць свайму мужу для яго больш блізкага знаёмства з Беларуссю. Падчас экскурсіі па заводзе зорная пара агледзела тэхніку, выстаўленую на дэманстрацыйнай пляцоўцы, пабывала на вытворчасці звышцяжкіх машын.
Галоўнай кропкай праграмы для біятлонных "пенсіянераў" стала язда на самым вялікім кар'ерным самазвале ў свеце — 450-тонным БелАЗе па завадскім палігоне. Домрачава і Б'ёрндален селі за руль самазвала і пракаціліся на ім пад наглядам прафесіяналаў.
"Цікава было ўжывую ўбачыць тое, што да гэтага часу бачыў толькі па тэлевізары. Самазвалы ўражваюць, як ўражвае і тое, як вырабляюцца гэтыя цудоўныя машыны, Беларусь можа імі ганарыцца. Вядома ж, новым для мяне быў досвед кіравання такой велізарнай машыны", — падзяліўся ўражаннямі Б'ёрндален.