У суботу 28 ліпеня Брэст шырока адзначыў сваё 999-годдзе. Мясцовыя жыхары і шматлікія госці горада сабраліся на галоўных святочных пляцоўках горада, каб масава ўшанаваць гэтую амаль круглую дату. Акрамя таго, на свята прыбылі прадстаўнікі афіцыйных дэлегацый з 11 краін свету.
Гарадскія ўлады пры дапамозе рэканструктараў аднавілі некалькі эпох з гісторыі горада. У намётавым лагеры можна было знайсці людзей у сярэдневяковых касцюмах, а таксама Першай і Другой сусветных войнаў.
Свята атрымалася па-сапраўднаму сямейным: людзі розных узростаў маглі знайсці сабе забаву па душы. Для дзяцей працавалі атракцыёны і праводзіліся розныя конкурсы, дарослыя маглі стаць удзельнікамі гістарычных рэканструкцый, а людзі старэйшага ўзросту маглі паслухаць канцэрты. Усё гэта задавала па-сапраўднаму святочны настрой і дазволіла добра павесяліцца.
Дарэчы, учора Брэст адзначаў яшчэ адно свята: у гэты дзень у 1944 годзе горад быў вызвалены ад нямецка-фашысцкіх захопнікаў.