МІНСК, 31 жні — Sputnik. Большасць буслоў ужо пакінулі Беларусь, паведамілі Sputnik арнітолагі.
У канцы жніўня карыстальнікі сацыяльных сетак сталі паведамляць пра масавы адлёт буслоў з рэспублікі — многія звязвалі гэта з няўстойлівым надвор'ем, якое ўстанавілася ў Беларусі ў канцы лета. Зрэшты, арнітолагі запэўніваюць: гэта нармальная з'ява.
Белыя буслы традыцыйна пакідаюць Беларусь да трэцяй дэкады жніўня. Большасць птушак ужо пакінулі нашу краіну, распавялі Sputnik арнітолагі.
Зімаваць белыя буслы будуць у Афрыцы. Тэрміны міграцыі могуць быць расцягнуты на некалькі тыдняў.
Некаторых буслоў можна будзе сустрэць у Беларусі і ўвосень, і нават узімку — бывае так, што асобіны вырашаюць застацца тут на зімоўку, прычым не толькі аслабленыя, але і здаровыя. Напрыклад, ужо пяць гадоў у мінскіх Шабанах зімуе бусел.
Беларусь ужо масава пакідаюць многія пералётныя віды, у тым ліку чорныя стрыжы, залацістыя шчуркі і івалгі. Зязюлі ў большасці сваёй ляцець пачалі яшчэ ў ліпені.
А вось гракі — знакамітыя персанажы карціны Аляксея Саўрасава "Гракі прыляцелі" — у большасці сваёй Беларусь не пакідаюць, сустрэць іх тут можна і зімой. Як адзначылі арнітолагі, пісаў сваю працу мастак у больш паўночных рэгіёнах, з якіх гэтыя птушкі сапраўды мігруюць. Аднак для Беларусі ў прысутнасці зімой гракоў няма нічога дзіўнага.