МІНСК, 3 кас — Sputnik. Пяты форум рэгіёнаў Беларусі і Расіі пройдзе ў Магілёве 10-12 кастрычніка, у яго рамках ужо праходзяць некаторыя мерапрыемствы.
Конкурс выступленняў
"Выдатна, што Форум рэгіёнаў будзе праходзіць у Магілёве, і я магу вам сказаць, што ён не толькі пяты па назве, але я з упэўненасцю магу зрабіць заяву: ён будзе лепшы сярод усіх папярэдніх", — заявіў старшыня пастаяннай камісіі Савета Рэспублікі Уладзімір Панцюхоў.
Па яго назіраннях, да форуму рыхтуюцца не толькі чыноўнікі, але наогул усё і нават самі магілёўцы.
"Ахвотных патрапіць на форум больш, чым калі-небудзь. Ахвотных выступіць з дакладамі яшчэ больш. У мяне на секцыі сапраўдная канкурэнцыя, каму даць слова", — абмаляваў ход арганізацыі Уладзімір Панцюхоў.
Пасля гэтага ён нагадаў, што пасля другога форуму было падпісана кантрактаў на 230 мільёнаў долараў, на трэцім — на 300 мільёнаў долараў, а на чацвёртым — ужо за 480 мільёнаў.
"Цяпер іх будзе не менш, чым 500 мільёнаў долараў. Толькі на Савеце дзелавога супрацоўніцтва 12 кастрычніка НВА "Хімвалакно" падпіша тры кантракты на суму ў 100 мільёнаў долараў", — зрабіў анонс сенатар.
У Брыльянтавай зале
Савет дзелавога супрацоўніцтва пройдзе ў рамках форуму і арганізаваны пры ўдзеле гандлёвых палат дзвюх краін.
"Ён пройдзе ў старым памяшканні, цяпер там ЗАГС. Калісьці там жыла сям'я Мікалая II. Гэта гістарычнае месца, і там мы правядзем нейкія паралелі дня мінулага, дня сённяшняга і нашых намераў на дзень заўтрашні", — пафіласофстваваў старшыня пастаяннай камісіі Савета Рэспублікі.
Праўда, потым ён дадаў, што ўсе камерцыйныя пагадненні і кантракты, якія будуць заключаны ў рамках Савета дзелавога супрацоўніцтва, пракладуць "нейкі масток у заўтрашні дзень".
"У Брыльянтавай зале мы абмяркуем нашы намеры і кантракты і ўзаемаадносіны бізнес-асяроддзя (дзвюх краін — Sputnik)", — рэзюмаваў Панцюхоў.