Новая сістэма ацэнкі вынікаў цэнтралізаванага тэсціравання (ЦТ) была прадстаўлена ў кастрычніку і адразу выклікала шмат пытанняў сярод педагогаў і бацькоў. У сераду дырэктар Рэспубліканскага інстытута кантролю ведаў (РІКВ) Юрый Міксюк адказаў на шэраг прэтэнзій і паспрабаваў растлумачыць сітуацыю з вынікамі тэсціравання ў цэлым.
Чаму спатрэбілася змяняць сістэму ацэнкі ЦТ?
Як распавёў журналістам Міксюк, змяніць методыку падліку балаў вырашылі па некалькіх прычынах.
Так, ранейшая сістэма ацэнкі ЦТ не адлюстроўвала ведаў абітурыентаў у абсалютнай велічыні: яна была рэйтынгавай. Дзяленнем на дзесяць "рэальную" ацэнку - тую, якую абітурыент атрымаў бы па прадмеце ў школе, атрымаць было нельга.
"Новая методыка дазваляе атрымаць абсалютнае значэнне ведаў", - падкрэсліў ён.
Рэальнай адзнака раней была толькі ў абітурыентаў з высокім узроўнем ведаў, а вось у "двоечнікаў" і "сярэднячкоў", па словах кіраўніка РІКВ, па старой методыцы балы прыніжаліся.
Чаму выбралі менавіта гэтую методыку?
Методыку ацэнкі вынікаў ЦТ зыходзячы з першаснага бала і пры гэтым захаванні пэўнага ранжыравання прыдумалі не ў Беларусі, падкрэсліў Міксюк. Такой сістэме больш за сто гадоў, і, па словах кіраўніка РІКВ, яна прымяняецца ў многіх развітых краінах свету.
"Гэта класічная методыка, найбольш даступная ў інтэрпрэтацыі. Ёсць і іншыя, але толькі дыпламаваныя матэматыкі змогуць яе зразумець. Мы выбралі тое, што выкарыстоўваецца даўно, прайшло праверку дзесяцігоддзямі ў ЗША, Германіі, Аўстраліі, Швейцарыі, Швецыі, Канадзе, Фінляндыі і іншых краінах", - растлумачыў ён.
Каментуючы прапанову аб тым, чаму нельга было адмовіцца ад ранжыравання і выкарыстоўваць толькі першасныя балы, Міксюк сказаў: яны б не былі аб'ектыўныя, бо ацэньваюць заданні таксама людзі і прысвоеныя рознымі экспертамі за розныя заданні балы могуць адрознівацца.
"Нельга спыняцца на першасных балах, неабходна правесці нармалізацыю. Гэта вядомы ў свеце факт. Як бы ні была прывабная простая методыка, калі мы вымяраем веды толькі першасным балам, гэта проста лічба, рэйтынгавае значэнне, якое не адлюстроўвае веды", - падкрэсліў ён.
Балы вырастуць?
Па словах Міксюка, для абітурыентаў з невысокім узроўнем ведаў балы на ЦТ вырастуць. А вось у тых, хто можа прэтэндаваць на 70-75 балаў і вышэй, і старая, і новая методыка дае аднолькавыя вынікі - спецыялісты ўжо вывучалі гэтае пытанне.
Для атрымання максімальнай адзнакі, як і раней, трэба будзе адказаць дакладна на ўсе пытанні. Гэта значыць атрымаць па-сапраўднаму высокі бал можна будзе толькі з ведамі. У цэлым новая сістэма больш аб'ектыўная, упэўненыя ў РІКВ.
Зрэшты, прызнаў Міксюк, прахадныя балы па шэрагу спецыяльнасцяў, дзе яны былі невысокімі, у 2019 годзе павялічацца. Таксама ён анансаваў і павелічэнне парогавых значэнняў ЦТ, аднак не ўдакладніў іх памер.