Бацька гомельскага блюзу Аляксандр Цыганок стаў героем фотапраекта "Punktum"

ГОМЕЛЬ, 11 лют - Sputnik. Аляксандр Цыганок выхаваў і выпусціў у вялікае жыццё дзясяткі музыкаў, а ў 54 сам упершыню стаў бацькам. Гэтае адкрыцце стала асновай фотагісторыі пазаштатнага фотакора Sputnik Марыі Амелінай.

Тры месяцы з маладымі аўтарамі з рэгіёнаў працавалі вядомыя фотажурналісты Сяргей Балай і Павел Волкаў, што ў выніку вылілася ў фотапраект "Punktum". Гэта гісторыі пра людзей, іх жыцці, каханне, пачуцці, барацьбу, штодзённасць і пошук сябе.

У ліку лепшых дзесяці работ - фотагісторыя пра гомельскага музыку і выкладчыка Аляксандра Цыганка. У Марыі атрымалася немагчымае: патрапіць на рэпетыцыі, куды пабочным асобам уваход забаронены, і правесці выхадныя ў кампаніі з Цыганковым-бацькам, які вазіў на санках свайго васьмігадовага Мішку.

"Куратары нам пастаянна паўтаралі - размаўляйце са сваімі героямі, калі трэба, дакранайцеся да іх, глядзіце адзін аднаму ў вочы. Я прывыкла назіраць за людзьмі збоку, таму для мяне такі фармат здымкі аказаўся складаным. Але гэта, безумоўна, вельмі цікавы вопыт", - падзялілася ўражаннямі Марыя Амеліна.

Арганізатары праекта салідарныя з Раланам Бартам, які ў сваім знакамітым эсэ "Camera lucida" выказаў думку аб тым, што лепшае ў фатаграфіі - гэта punktum (кропка). Тое непрыкметнае, што чапляе раз і назаўжды. Адчуванне, якое ўзнікае пры першым поглядзе на фотаздымак і потым не адпускае, прымушаючы вяртацца ў думках да ўбачанага зноў і зноў.

Наколькі гэта атрымалася ў нашай калегі і іншых удзельнікаў праекта, можна ацаніць у бліжэйшы аўторак, 12 лютага, у Літаратурным музеі Пятруся Броўкі. На адкрыцці выставы можна пагутарыць з куратарамі курсу і аўтарамі фотагісторый, даведацца пра іх ўражанні.

Выстава адкрыецца ў 18:30, уваход вольны.