МІНСК, 26 сак - Sputnik. Ранняя вясна патрабуе мабілізацыі і арганізаванасці, заявіў у эфіры тэлеканала "Беларусь 1" міністр сельскай гаспадаркі і харчавання рэспублікі Леанід Заяц.
Прэзідэнт Беларусі Аляксандр Лукашэнка наведаў у панядзелак адно з сельскагаспадарчых прадпрыемстваў у Шклоўскім раёне рэспублікі. Галоўнай тэмай размовы беларускага лідара з чыноўнікамі стала сельская гаспадарка.
Больш падрабязна аб планах на 2019 год журналістам распавёў кіраўнік профільнага міністэрства.
"У гэтым годзе стаіць задача павялічыць аб'ёмы вытворчасці прадукцыі раслінаводства не менш як у 1,2 разы. Таму ранняя вясна патрабуе мабілізацыі, арганізаванасці, каб у сціснутыя агратэхнічныя тэрміны правесці сяўбу ранніх яравых збожжавых культур", - заявіў Заяц.
Па словах міністра, Беларусь тэхнічна да ўсіх работ гатовая.
У цэлым жа, у гэтым годзе Беларусь разлічвае на не менш чым 8,5 мільёна тон збожжа, а таксама высокія паказчыкі па астатніх культурах. Сёння ўмовы надвор'я спрыяюць правядзенню палявых работ, запэўніў Заяц.
Нагадаем, падчас наведвання Шклоўскага раёна кіраўнік дзяржавы даручыў кіраўніку Адміністрацыі прэзідэнта Наталлі Качанавай падрыхтаваць прапановы па замене віцэ-прэм'ера Міхаіла Русага і памочніка прэзідэнта па Магілёўскай вобласці Міхаіла Лаўрэнкова.