МІНСК, 17 кра - Sputnik. Пошукавы перыяд 2019 года адкрыты ў Беларусі 15 красавіка - вайскоўцы 52-га асобнага спецыялізаванага пошукавага батальёна ўжо выехалі на раскопкі, паведаміла ў сераду міністэрства абароны Беларусі.
План на гэты год - правесці пошукавыя работы на 96 аб'ектах па ўсёй рэспубліцы. У некаторых выпадках вайскоўцам будуць дапамагаць мясцовыя гісторыка-патрыятычныя клубы.
"Спецыялізаваныя пошукавыя падраздзяленні 52-га АСПБ накіраваныя ў Віцебскую і Магілёўскую вобласці краіны для вядзення раскопак на меркаваных няўлічаных воінскіх пахаваннях. У Магілёўскім раёне палявыя пошукавыя работы будуць праведзеныя з удзелам членаў Магілёўскага абласнога гісторыка-патрыятычнага пошукавага клуба "Віккру", - распавёў вядучы спецыяліст упраўлення па ўвекавечанні памяці абаронцаў Айчыны і ахвяр войнаў Узброеных Сіл Аляксандр Лугін.
У гэтым годзе пошукавікам ужо даводзілася выязджаць на пазапланавыя раскопкі, калі на месцы будоўлі ў Брэсце знайшлі пахаванне вязняў гета. Тады з зямлі было вынята 1214 парэшткаў загінулых.
За мінулы год вайскоўцы правялі раскопкі на 67 аб'ектах і вынялі для наступнай перадачы на пахаванне парэшткі больш 1930 загінулых. Устаноўлены асобы толькі 55 з іх.
Таксама падчас пошукавых работ былі знойдзеныя пяць узнагарод, салдацкія медальёны, стралковая зброя, боепрыпасы і больш за 3500 іншых прадметаў.