МІНСК, 10 мая - Sputnik. Дзень Перамогі напярэдадні адзначалі не толькі ў Беларусі, але і па ўсім свеце: у краінах былога СССР і еўрапейскіх дзяржавах. Вядома, самай яркай "пераможнай" акцыяй у апошнія гады называюць "Бессмяротны полк". Як прайшло гэтае шэсце ў розных гарадах - у аглядзе Sputnik.
Першыя асобы ў палку
У Расіі, як правапераемніцы перамогі СССР у Вялікай Айчыннай вайне, раніцай 9 мая прайшоў традыцыйны парад на Чырвонай плошчы. На жаль, з-за дрэннай бачнасці прыйшлося адмяніць яго паветраную частку. Пры гэтым пахмурнае неба не перашкодзіла масквічам і гасцям расійскай сталіцы прайсці па цэнтры горада маштабным шэсцем "Бессмяротны полк". Узначаліў марш прэзідэнт Расіі Уладзімір Пуцін, які нёс у руках партрэт свайго бацькі.
На парад Перамогі ў Маскву прыехаў экс-прэзідэнт Казахстана Нурсултан Назарбаеў. На галоўную трыбуну ён выйшаў разам з прэзідэнтам Расіі, вярхоўным галоўнакамандуючым Уладзімірам Пуціным і прэм'ер-міністрам Расіі Дзмітрыем Мядзведзевым.
Прэзідэнт Беларусі Аляксандр Лукашэнка не паехаў на Парад Перамогі ў Маскву, традыцыйна ён адзначае 9 мая разам з беларускімі ветэранамі ў Мінску. Паводле яго слоў, "цяжка развесці гэтыя два мерапрыемствы" - урачыстасці ў Мінску і ў Маскве на 9 Мая. І ў гэты дзень, па традыцыі, разам з прэзідэнтам у цырымоніі ўскладання кветак і вянкоў да манумента Перамогі прынялі ўдзел тры яго сыны.
Дарэчы, за гадзіну да афіцыйнай акцыі "Беларусь памятае" у цэнтры Мінска пачалі збірацца ўдзельнікі акцыі "Бессмяротны полк", якую дазволілі правесці мінскія ўлады. Мінчане і госці сталіцы, трымаючы плакаты сваякоў, уліліся ў мітынг на плошчы Перамогі.
Цырымонія свята
У іншых гарадах СНД, напрыклад, у Бішкеку прайшоў як "Бессмяротны полк", так і святочны канцэрт. Прэзідэнт Кыргызстана Сааранбай Жээнбекаў узначаліў шэсце палка.
У Ерэване, паведамляе Sputnik Арменія, у калоне таксама ішоў прэзідэнт краіны Армэн Саркісян. Разам з ім у шэсці прынялі ўдзел тысячы людзей, якія неслі партрэты сваіх родных і блізкіх, што ўдзельнічалі ў ВАВ.
У Ташкенце паказалі новую ваенную тэхніку, а маршрут шэсця палка абмежаваўся мемарыяльным комплексам "Брацкія магілы".
У Таджыкістане прайшоў ваенны парад, у якім выступілі 2 тысячы вайскоўцаў. А яшчэ там у гэтым годзе ўпершыню афіцыйна ўзгаднілі акцыю "Бессмяротны полк". У выніку ў шэсці ў Душанбэ прынялі ўдзел больш за дзве тысячы чалавек. Дарэчы, самых пажылых удзельнікаў прывезлі ў мясцовы парк Перамогі на аўтобусах, а самых маленькіх бацькі везлі на калясках і веласіпедах.
У сталіцы Казахстана ўдзел у акцыі "Бяссмяротнага палка" прынялі каля 25 тысяч чалавек. Шэсце стартавала ад плошчы ад манумента "Казак елі", затым удзельнікі прайшлі па праспекце Тауелсіздзік да плошчы "Атан коргаушылар". Таксама "Бессмяротны полк" прайшоў у Дзень Перамогі па вуліцах Алма-Аты.
Свае парады і "Бессмяротныя палкі" правялі таксама ў ЛНР і ДНР. У Данецку шэсце сабрала каля 100 тысяч чалавек. А па галоўнай плошчы Луганска з партрэтамі ветэранаў прайшлі больш за 60 тысяч чалавек.
У сталіцы Малдовы Кішынёве, як піша Sputnik Малдова, прайшлі і Марш Перамогі і "Бессмяротны полк", а ўвечары яшчэ і святочны канцэрт.
Еўрапейскі акцэнт
У Таліне, паводле інфармацыі Sputnik Эстонія, расійскія дыпламаты ўсклалі вянок і кветкі да падножжа "Бронзавага салдата" на вайсковых могілках, пры тым, што ў Эстоніі афіцыйна не адзначаюць Дзень Перамогі 9 мая. Ля помніка была выстаўлены ганаровая варта з юнакоў і дзяўчат у форме чырвонаармейцаў і маракоў-балтыйцаў.
Таксама і ў Рызе, нягледзячы ні на што, тысячы людзей ішлі да помніка Вызваліцелям, каб ускласці кветкі. А следам у акцыі "Бессмяротны полк" удзел узялі каля 20 тысяч чалавек. Як паведамляе Sputnik Латвія, акцыя прайшла ў краіне ў пяты раз і стала рэкорднай.
Каля 700 тысяч чалавек прынялі ўдзел у мерапрыемствах да Дня Перамогі ва Украіне: людзі выйшлі з партрэтамі загінулых у вайне ў Кіеве, у Адэсе, Львове.
Дарэчы, шэсця "Бяссмяротнага палка", а таксама шэраг іншых мерапрыемстваў, прысвечаных Перамозе ў Вялікай Айчыннай вайне, прайшлі не толькі на тэрыторыі краін СНД і постсавецкай прасторы, але і па ўсім свеце: у Лондане, Афінах.
Напрыклад, тысячы людзей прынялі ўдзел у святкаванні Дня Перамогі ў Берліне, дзе многія традыцыйна наведалі мемарыяльны комплекс у Трэптаў-парку. А калоны людзей "Бяссмяротнага палка" у пяты раз прайшлі па цэнтры Берліна, ад Брадэнбургскіх варотаў да мемарыяльнага комплексу ў парку Тыргартэн.