МІНСК, 4 чэр - Sputnik. Адзін чалавек, заняты ў сяльгасгаліне, корміць дваццаць чалавек у горадзе, заявіў міністр сельскай гаспадаркі і харчавання Анатоль Хацько падчас адкрыцця выставы "Белагра".
Ён таксама адзначыў, што па аб'ёме харчавання на душу насельніцтва Беларусь займае лідзіруючае месца сярод краін СНД і ўваходзіць у пяцёрку экспарцёраў малочнай прадукцыі.
"Аграпрамысловы комплекс дэманструе станоўчую дынаміку развіцця", - дадаў міністр у прывітальнай прамове да ўдзельнікаў выставы.
Форум збірае не толькі беларускіх аграрыяў, удзельнікі прыехалі з 29 краін. Аб'ёмы заключаных на выставе кантрактаў дасягаюць штогод 80-100 млн долараў.
"З кожным годам колькасць удзельнікаў расце", - сказаў намеснік прэм'ер-міністра Уладзімір Дворнік і адзначыў, што ў гэтым годзе ёсць новыя ўдзельнікі. Ён пажадаў дабрабыту, высокага ўраджаю, прыбытку і новых кантрактаў усім, хто прыехаў на выставу.
Міністр прамысловасці Павел Уцюпін звярнуў увагу на разнастайнасць прадстаўленай тэхнікі. "Многія з узораў тэхнікі ўжо сталі легендамі, некаторыя дэманструюцца ўпершыню", - сказаў Уцюпін.
Старшыня прэзідыума НАН Уладзімір Гусакоў дадаў, што акадэмія прадстаўляе больш за дзвесце распрацовак сферы на выставе.
Выстава "Белагра" традыцыйна адкрылася пад Мінскам 4 чэрвеня.
Чытайце таксама:
- Навошта 20-гадоваму хлопцу з Расіі шэсць кароў і бедная Шаркаўшчына
- Лукашэнка: Беларусь можа абысціся без стратных гаспадарак
- Навуковец: добры ўраджай кавуноў у Беларусі можа вырасціць нават пачатковец