МІНСК, 18 ліп - Sputnik. Штармавое папярэджанне аб'яўлена ў Беларусі на чацвер 18 ліпеня, паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя.
Надвор'е ў краіне пагоршылася ў пачатку гэтага тыдня: пахаладала, месцамі па рэспубліцы прайшлі моцныя дажджы, якія часам суправаджаліся градам.
Паводле інфармацыі сіноптыкаў, у чацвер у асобных рэгіёнах Беларусі прагрымяць навальніцы, а на паўночным усходзе краіны пройдуць моцныя дажджы.
У сувязі з неспрыяльнымі ўмовамі надвор'я ў краіне аб'яўлены жоўты ўзровень небяспекі.
Па дадзеных Гідрамета, 18 ліпеня ў Мінску і Гомелі днём будзе каля +21°C, у Брэсце +24°C, у Віцебску - каля +19°C, у Гродне + 23°C, у Магілёве +20°C.
Сіноптыкі абяцаюць, што да выхадных надвор'е ў Беларусі зменіцца: дажджоў стане менш, а тэмпература паветра падымецца да адзнакі +27°C.