МІНСК, 24 ліп - Sputnik. Штармавое папярэджанне аб'явілі сіноптыкі на сераду ў Беларусі з-за навальніц, адпаведная інфармацыя размешчана на сайце рэспубліканскага гідраметцэнтра.
"Увага, 24 ліпеня (у сераду) у асобных раёнах рэспублікі чакаюцца навальніцы", - папярэдзілі спецыялісты і паведамілі, што ў сувязі з непагаддзю ў краіне аб'яўлены жоўты ўзровень небяспекі.
У апошнія дні ў Беларусі назіраецца няўстойлівае надвор'е: амаль па ўсёй тэрыторыі прайшлі дажджы рознай інтэнсіўнасці, грукаталі навальніцы ў суправаджэнні ветру, парывы якога дасягалі 21 метра за секунду. Тэмпература паветра ў асноўным знаходзілася каля кліматычнай нормы.
Паводле звестак Белгідраметцэнтра, у сераду, 24 ліпеня, на надвор'е ў рэспубліцы паўплывае вобласць паніжанага атмасфернага ціску, па паўднёвым усходзе краіны адаб'ецца ўплыў франтальнага падзелу.
"Чакаецца воблачна з праясненнямі. Месцамі па рэспубліцы, а па Магілёўскай і Гомельскай абласцях на большай частцы тэрыторыі кароткачасовыя дажджы, у асобных раёнах навальніцы", - папярэдзілі сіноптыкі.
У начныя гадзіны магчымы слабы туман. Тэмпература паветра ў начны час будзе знаходзіцца ў межах +10..+16°С, а днём прагрэецца максімум да +21..+27°С.