Пенсіянерка Людміла Грышкавец са Слуцка выпадкова даведалася, што расійскі рэжысёр Аляксей Мурадаў прыедзе здымаць серыял "Чарнобыль" у Беларусь. Інфармацыю пра тое, што патрабуюцца акцёры масоўкі знайшла на старонках мясцовай газеты і адразу ж загарэлася ідэяй паўдзельнічаць.
"Мой муж быў у ліку ліквідатараў, якія знаходзіліся ў месцы аварыі літаральна ў першыя гадзіны. Ездзіў туды тры разы і страціў там здароўе. У мінулым годзе яго не стала і я вырашыла, што ўдзел у здымках - мой абавязак, даніна памяці", - распавядае жанчына.
Яна была на здымках у Слуцку, Старых Дарогах і Мінску. Як заяўлялі ў інтэрв'ю стваральнікі серыяла, выбару лакацый яны надалі асаблівую ўвагу і "знайшлі месцы, дзе час, здаецца, спыніўся ў 80-ых гадах".
Здымкі ў расійскім "Чарнобылі" - першы акцёрскі вопыт для Людмілы. У 6 раніцы яна разам з іншымі акцёрамі масоўкі павінна была прыехаць за касцюмамі і на грым - у Слуцку месцам дыслакацыі быў Дом Афіцэраў. Падрыхтоўка займала каля дзвюх гадзін, а далей людзі адпраўляліся на здымачную пляцоўку, дзе праводзілі ў сярэднім па 10-12 гадзін. Плацілі кожнаму па-рознаму - у сярэднім 20-50 рублёў, жадаючым прапаноўвалі ежу з мінскага рэстарана.
"Мяне ўразіла працаздольнасць рэжысёра і акцёраў. Некаторыя сцэны даводзілася пераздымаць па некалькі разоў з-за нашай няўважлівасці: хтосьці ўсміхнуўся не своечасова, хтосьці забыўся выключыць мабільны тэлефон", - успамінае Людміла.
Самым яркім і адначасова самым складаным эпізодам здымак для пенсіянеркі стала эвакуацыя з вакзала: людзям давялося тоўпіцца, штурхаць адзін аднаго, каб патрапіць у свабодны аўтобус.
Жанчына павінна была наступіць на дзіцяці, якое адбілася ад родных і ўпала.
"Калі пачалася здымка і дзіця ўпала, мне падалося, што нешта пайшло не так. Замест таго, каб ступіць ў пары сантыметраў ад галавы дзіцяці і пабегчы далей, я яго падхапіла на рукі чыста інстынктыўна", - дзеліцца ўражаннямі Людміла.
Яна разгубілася і спынілася, разумеючы, як памылілася. Эпізод прыйшлося пераздымаць, але перад гэтым другі рэжысёр Наталля Кабанава супакойвала: "Не перажывайце, вы паступілі як маці".
"Усё атрымалася максімальна праўдападобна"
Яшчэ адна задача, якую ставіла перад сабой Людміла - убачыць на ўласныя вочы, як будуць перадаваць падзеі Чарнобыльскай катастрофы ў серыяле. Ацаніць дакладнасць дазваляюць гісторыі мужа: ён шмат распавядаў пра працу ліквідатараў.
Жанчына сцвярджае, што тыя моманты, у якіх ёй давялося паўдзельнічаць, атрымаліся максімальна праўдападобнымі.
У перапынках паміж здымкамі давялося пагаварыць з каскадзёрамі і акцёрамі. Насуперак чаканням случанкі, усе яны апынуліся вельмі прыязнымі і ветлымі, без лішняга пафасу.
Ёй удалося нават перакінуцца парай слоў з рэжысёрам Аляксеем Мурадавым - даведацца пра яго ўражанні ад здымак і самой расказаць, чаму так хацела патрапіць сюды.
"Я пайшла на здымку не дзеля грошай. Успрымаю як гонар магчымасць паўдзельнічаць у такой эпахальнай падзеі", - распавядае пенсіянерка.
Нашумелы амерыканскі серыял яна пакуль не глядзела. Кажа, што да выхаду рускай версіі "Чарнобыля" не будзе гэтага рабіць.
"Убачыла некалькі каментароў крытыкі да трэйлера і хачу сказаць: нельга крытыкаваць увесь фільм з-за роліка даўжынёю ў некалькі хвілін. Негатыў адносна да рускага серыяла мне не падабаецца, недахопы ёсць як у нас, так і ў HBO", - упэўненая яна.
Расійскі серыял "Чарнобыль" выйдзе на экраны ў 2019 годзе. Стваральнікі запэўніваюць, што гэта будзе першы расійскі 12-серыйны фільм, якія крок за крокам прадставіць гісторыі аварыі на Чарнобыльскай АЭС. Дзеянне серыяла разгортваецца з красавіка па снежань 1986 года, ролі выканалі Ігар Пятрэнка, Надзея Міхалкова, Дзмітрый Ульянаў, Марыя Андрэева, Уладзімір Юматаў і іншыя.