Фотафакт: выстава памяці Івана Луцкевіча адкрылася ў Мінску

Унікальная выстава да стагоддзя са дня смерці грамадскага і навуковага дзеяча Івана Луцкевіча адкрылася напярэдадні ў Мінску. Упершыню убачыць экспанаты, прысвечаныя жыццю і дзейнасці знакамітага чалавека можна ў Дзяржаўным літаратурным музеі імя Янкі Купалы.

У аснове экспазіцыі – матэрыялы з беларускіх і літоўскіх музеяў, у тым ліку рэчы з сямейнага архіву.

Іван Луцкевіч – грамадскі і навуковы дзеяч, які нарадзіўся на тэрыторыі сучаснай Літвы, некаторы час жыў у Мінску. Збіраў знакамітыя слуцкія паясы і іншыя рарытэты. Менавіта яго калекцыя стала падмуркам для стварэння Беларускага музея, якім займаўся брат Антон.

Дзякуючы дзейнасці гэтага музея стала магчымым захаваць рукапісы твораў Янкі Купалы "Паўлінка", "Сон накургане", "Шляхам жыцця", іх таксама можна ўбачыць на экспазіцыі.

Браты Луцкевічы ўвогуле адыгралі знакавую ролю ў жыцці Янкі Купалы, на працягу доўгіх гадоў яны падтрымлівалі прыязныя кантакты, таму адкрыццё выставы ў Купалаўскім музеі можна лічыць сімвалічным.