МІНСК, 19 вер - Sputnik. Старшыня Гродзенскага аблвыканкама Уладзімір Краўцоў заявіў, што фізічны пуск першага блока Беларускай АЭС з выдачай магутнасці ў сетку павінен адбыцца ў пачатку 2020 года.
Паводле яго слоў, работы на першым блоку АЭС набліжаюцца да завяршэння: там ідуць выпрабаванні розных вузлоў і наладка абсталявання.
"Пакуль кіраўніцтва генеральнага падрадчыка, а гэта расійская карпарацыя "Расатам", дэкларуе, што яны ва ўстаноўленыя тэрміны забяспечаць завяршэнне будаўніцтва першага блока атамнай станцыі. Гэта пачатак наступнага года, па ўсіх планах, павінен адбыцца фізічны пуск і ўжо з выдачай канкрэтнай магутнасці", - сказаў Краўцоў у эфіры тэлеканала "Беларусь 1".
Беларуская АЭС будзе абсталявана двума рэактарамі ВВЭР-1200 сумарнай магутнасцю 2400 МВт. Яе будуюць у Гродзенскай вобласці каля Астраўца па расійскім праекце. "Расатам" выступае ў якасці генеральнага падрадчыка будаўніцтва. Раней планавалася, што запуск першага энергаблока адбудзецца ў канцы 2019 года, другога - у 2020 годзе.