МІНСК, 20 сту - Sputnik. Дзяржаўным сакратаром Савета бяспекі Беларусі прызначаны Андрэй Раўкоў, адпаведнае рашэнне ў панядзелак прыняў прэзідэнт рэспублікі Аляксандр Лукашэнка.
Пасада дзяржсакратара Савета бяспекі была вакантная з 1 студзеня - пасля таго, як Станіслаў Зась сышоў працаваць сакратаром Арганізацыі дамовы аб калектыўнай бяспецы (АДКБ).
Згодна з рашэннем прэзідэнта, на пасадзе дзяржсакратара Зася заменіць Андрэй Раўкоў, які апошнія пяць гадоў займаў пасаду міністра абароны.
Андрэю Раўкову 52 гады. У свой час ён узначальваў 103-ую асобную гвардзейскую мабільную брыгаду ВС Беларусі, пасля - з 2006 па 2012 - займаў пасады начальніка аператыўнага аддзела - намесніка начальніка штаба Заходняга аператыўнага камандавання, а таксама начальніка штаба - першага намесніка камандуючага войскамі Паўночна-заходняга аператыўнага камандавання.
З сярэдзіны лістапада 2012 года і да лістапада 2014 года Раўкоў займаў пасаду камандуючага войскамі Паўночна-заходняга аператыўнага камандавання.