МІНСК, 7 лют - Sputnik. Прэзідэнт Расіі Уладзімір Пуцін сустрэў беларускага калегу Аляксандра Лукашэнку на ганку дома прыёмаў афіцыйных дэлегацый "Лаура" у сочынскай Чырвонай Паляне.
"Настрой у абодвух добры. Смяяліся", - паведамляе Telegram-канал Пул Першага.
Лукашэнка пажартаваў, што Пуціну шанцуе: шмат снегу, а там, дзе спыніўся беларускі прэзідэнт, снегу не засталося.
Кіраўнікі дзяржаў абняліся, абмеркавалі надвор'е і прайшлі ўнутр, дзе пачалася сустрэча адзін-на-адзін. Сустрэча ў пашыраным складзе адбудзецца пазней, калі ў Сочы дабяруцца члены расійскай дэлегацыі - з-за дрэннага надвор'я вылет маскоўскага борта затрымаўся.
Пуцін і Лукашэнка ў пятніцу абмяркуюць шырокі комплекс пытанняў, якія стаяць на парадку дня беларуска-расійскага супрацоўніцтва, паведамлялі раней у прэс-службе кіраўніка беларускай дзяржавы. У Крамлі ў сваю чаргу анансавалі абмеркаванне бакамі супрацоўніцтва ў кантэксце інтэграцыйных працэсаў, "у тым ліку ў кантэксце інтэграцыйных працэсаў у рамках Саюзнай дзяржавы".
"Я так разумею, і пра гэта яму буду казаць адкрыта, - нейкі момант ісціны наступіў. Мы з ім стварылі гэтыя добрыя адносіны (паміж Беларуссю і Расіяй - Sputnik). Мы былі архітэктарамі гэтых адносін, ці нам іх ламаць на зыходзе нашай палітычнай кар'еры. Мы ж не вечныя. Што мы пакінем пасля сябе - вось у чым пытанне", - казаў Аляксандр Лукашэнка, анансуючы сустрэчу.
Асноўныя пытанні ў беларуска-расійскіх адносінах сёння звязаныя з пастаўкамі энерганосьбітаў. Па кошце газу для Беларусі бакі дамовіліся толькі на першыя два месяцы года. Пытанне паставак нафты на сёння не вырашана, таму рэспубліка закупляе "чорнае золата" ў кампаній бізнесмена Міхаіла Гуцырыева і ў нарвежскіх кампаній.
Акрамя таго, Беларусь і Расія пакуль не завяршылі ўзгадненне дарожных карт па паглыбленні інтэграцыі ў рамках Саюзнай дзяржавы.