ВІЦЕБСК, 9 мая - Sputnik. Горад на Дзвіне пачаў святкаванне 75-годдзя Перамогі з ускладання кветак да мемарыяльнага комплексу "Тры штыкі". Мерапрыемства атрымалася нешматлюдным, але вельмі ўрачыстым.
Святочныя вянкі і кветкі да манумента ўсклалі прадстаўнікі кіраўніцтва вобласці, горада, сілавых структур і розных грамадскіх арганізацый. Гэта было адно з нешматлікіх мерапрыемстваў, якія запланаваны на 9 мая.
Усім гасцям прадстаўнікі БРСМ раздавалі святочныя стужачкі і апрацоўвалі рукі антысептыкам. Госці ўсклалі кветкі пад гукі ваеннага аркестра.
Пасля ўрачыстых залпаў, якія выканалі байцы 103-й Віцебскай асобнай гвардзейскай паветрана-дэсантнай брыгады, прысутныя ўшанавалі памяць загінулых салдат Вялікай айчыннай вайны хвілінай маўчання.
Як адзначылі ў Віцебскім аблвыканкаме, на працягу дня для жыхароў горада будуць працаваць атракцыёны ў парку Пераможцаў і парку Мазурына.
Увечары 9 мая ў 23:00 адбудзецца святочны салют, жадаючыя змогуць яго паглядзець на плошчы Перамогі.
"А прыйшоўшы на плошчу на пяць хвілін раней, у 22:55, гараджане змогуць разам праспяваць песню "Дзень Перамогі", - нагадалі ў аблвыканкаме.
Пры гэтым суразмоўцы падкрэслілі, што нікога не заклікаюць наведваць вячэрняе мерапрыемства.