МІНСК, 28 жні - Sputnik. Супрацоўнікі міліцыі за мінулыя суткі па краіне затрымалі падчас несанкцыянаваных акцый 114 грамадзян, паведамілі ў МУС.
Напярэдадні, 27 жніўня, у краіне прайшоў шэраг грамадска-палітычных масавых мерапрыемстваў. У гэтай сувязі МУС прыняло неабходныя меры па падтрыманні парадку і забеспячэнні бяспекі іх правядзення. Было зафіксавана 37 месцаў палітычнай актыўнасці грамадзян, у якіх прынялі ўдзел каля пяці тысяч чалавек.
"Найбольш актыўныя пратэстныя акцыі адбыліся ў сталіцы. Увечары на плошчы Незалежнасці каля касцёла Святога Сымона і святой Алены сабраліся каля 1400 чалавек. Усяго па краіне да разгляду ў судзе спраў па адміністрацыйных парушэннях затрыманыя 114 грамадзян", - сказалі Sputnik у МУС.
Падчас правядзення несанкцыянаванага мерапрыемства праваахоўнікі даставілі ў Кастрычніцкі РУУС Мінска каля 50 журналістаў для праверкі дакументаў, якія пацвярджаюць законнасць іх прафесійнай дзейнасці. Практычна ўсе прадстаўнікі зарэгістраваных СМІ, а таксама замежныя журналісты, акрэдытаваныя пры МЗС, былі адпушчаныя.
"У дачыненні да аднаго з журналістаў складзены адміністрацыйны пратакол (ён таксама быў адпушчаны). Яшчэ адзін замежны журналіст высланы з краіны ў добраахвотным парадку", - удакладнілі ў міліцыі.
Мерапрыемствы ў падтрымку прэзідэнта Аляксандра Лукашэнкі таксама прайшлі ў розных рэгіёнах краіны. Паводле звестак МУС, у іх бралі ўдзел больш за 2400 чалавек.