Аб санкцыях у адказ краінам Балтыі заявіў на мінулым тыдні прэзідэнт Беларусі Аляксандр Лукашэнка, адзначыўшы, што "ім далі каманду "фас", яны і вякнулі з-пад плота", пры гэтым, на думку Лукашэнкі, вядучыя еўрапейскія краіны ўстрымаліся ад увядзення санкцый з-за асцярогі, што Беларусь можа закрыць межы пад Брэстам і Гродна, і, да прыкладу, нямецкія грузы не змогуць так лёгка патрапіць на Усход.
Заявы Лукашэнкі прагучалі ў адказ на рашэнне трох прыбалтыйскіх краін забараніць уезд на свае тэрыторыі 30 грамадзянам Беларусі, якія маюць дачыненне, на думку Вільнюса, Рыгі і Таліна, да фальсіфікацыі вынікаў выбараў і гвалту ў адносінах да ўдзельнікаў пратэстаў.
Калі казаць пра люстраныя санкцыі, то з беларускага боку, відавочна, таксама павінна быць забарона на ўезд у Беларусь часткі прыбалтыйскіх чыноўнікаў і палітыкаў, заўважаных у варожай дзейнасці або заявах у дачыненні да Беларусі, мяркуе суразмоўца Sputnik - дырэктар цэнтра даследаванняў перспектыў інтэграцыі, галоўны рэдактар парталу RuBaltic Сяргей Рэкеда.
Што да эканамічных санкцый, то на дадзены момант Беларусь наўрад ці пойдзе на нейкае маштабнае абмежаванне эканамічнай актыўнасці з гэтымі краінамі, мяркуе суразмоўца.
"Нягледзячы на тое, што прэзідэнт Беларусі гаварыў аб пераарыентацыі транзіту з Клайпеды, пакуль, я думаю, гэта пытанне не вырашанае, таму што Беларусь заўсёды зыходзіць з эканамічнай мэтазгоднасці і разумее, што ў любым выпадку санкцыйная вайна, якая закранае эканамічныя сферы, будзе біць і па бюджэце, і па дабрабыту насельніцтва. Гэта будзе сур'ёзным стрымліваючым фактарам для адказу з боку Мінска", - лічыць Рэкеда.