МІНСК, 29 сак – Sputnik. Каронавірус, які выклікаў пандэмію, мог быць перададзены чалавеку ад кажаноў праз жывёлу-пасярэдніка, пра гэта паведамляе Associated Press.
Агенцтва ў панядзелак атрымала версію даклада экспертаў Сусветнай арганізацыі аховы здароўя (СААЗ) па выніках расследавання, праведзенага ў кітайскім горадзе Ухань. Справаздача афіцыйна пакуль не апублікавана, і невядома, ці будуць у яе ўносіцца нейкія змяненні.
Даследчыкі пералічылі чатыры сцэнарыі ўзнікнення каронавіруса і ацанілі іх верагоднасць:
- найбольш верагодны шлях, на іх думку, - перадача віруса чалавеку праз другую жывёлу так званую "жывёлу-пасярэдніка";
- менш магчымы, але таксама верагодны - прамая перадача віруса ад кажаноў чалавеку;
- магчымым, але малаверагодным назвалі эксперты сцэнарый распаўсюджвання віруса праз харчовыя прадукты;
- апошняя версія - уцечка віруса з лабараторыі - ацэньваецца як "вельмі малаверагодная".
Па трох першых версіях эксперты лічаць магчымым працягнуць далейшыя даследаванні ва ўсіх абласцях.
Вынікі даследавання "былі ў асноўным такімі, як і чакалася, і пакінулі многія пытанні без адказу", адзначае агенцтва.
Місія СААЗ і пытанне паходжання COVID-19
Нагадаем, што міжнародная місія экспертаў працавала ў Кітаі ў студзені-лютым 2021 года - мэтай было вывучэнне паходжання каронавіруса.
Спецыялісты наведалі рынкі, бальніцы і навуковыя цэнтры - у прыватнасці, Уханьскі інстытут вірусалогіі, з якім былі звязаны чуткі аб уцечцы і штучным паходжанні COVID-19.
На брыфінгу пасля завяршэння працы эксперты расказалі пра вынікі, заявіўшы, што пакуль не могуць вызначыць, як узнік каронавірус, аднак назвалі чатыры найбольш магчымыя, на іх думку, версіі яго паходжання. Ужо тады больш за ўсё навукоўцы схіляліся да версіі перадачы віруса чалавеку праз прамежкавага носьбіта.
Яны таксама выказалі здагадку, што захворванні на каронавірус маглі пачацца да даты, калі было афіцыйна абвешчана пра успышку ў Кітаі.
На сёння, па дадзеных універсітэта Джона Хопкінса, у свеце каронавірусам заразіліся звыш 127 мільёнаў чалавек, амаль 2,8 мільёна памерлі. У лік краін з 10 мільёнамі і больш заражэнняў каронавірусам уваходзяць ЗША, Бразілія і Індыя.
Чытайце таксама:
- Эксперты СААЗ адмовіліся публікаваць папярэднюю справаздачу аб працы ў Кітаі
- СААЗ заклікала павялічыць фінансаванне на барацьбу з COVID
- Колькі чалавек на Зямлі маюць антыцелы да каронавіруса, падлічылі ў СААЗ