МІНСК, 30 сак – Sputnik. Прыйшоў час яшчэ раз паглядзець на тое, якія рашэнні і на якім узроўні павінны прымацца, заявіў прэзідэнт Беларусі Аляксандр Лукашэнка на нарадзе, прысвечанай пераразмеркаванню паўнамоцтваў галін улады.
Паводле яго слоў, у час фарміравання і наступнага развіцця рэспублікі значная доля пытанняў была замкнёна на рашэннях, якія прымаў прэзідэнт.
"Гэта было зроблена для таго, каб навесці парадак у рабоце з бюджэтам, зберагчы дзяржаўную маёмасць, нетры, усё тое, што належыць (і я спадзяюся, будзе належыць) беларускаму народу. Не дапусціць алігархіі, абвальнай прыватызацыі і расслаення грамадства, выбудаваць ключавыя інстытуты ўлады", - нагадаў ён.
Аляксандр Лукашэнка лічыць, што з дапамогай гэтага атрымалася зарыентаваць усю ўладу на рэалізацыю агульнай дзяржаўнай палітыкі ва ўсіх сферах. Дзякуючы чаму ў рэспубліцы выбудавалася сістэма кантролю, фінансаў, а рашэнні, прынятыя ў вышэйшых эшалонах улады, даводзяцца да ўсіх выканаўчых звёнаў.
"Але чвэрць стагоддзя - немалы этап развіцця. Тым больш для такой маладой дзяржавы, як наша. Таму, як я казаў раней, прыйшоў час яшчэ раз паглядзець на тое, якія рашэнні і на якім узроўні павінны прымацца", - нагадаў ён яшчэ раз.
Частка рашэнняў наспела
Раней кіраўнік дзяржавы даваў даручэнне аб вывучэнні магчымасцей пераразмеркавання паўнамоцтваў паміж галінамі ўлады. Урад, дэпутаты і мясцовыя ўлады падрыхтавалі адпаведныя прапановы.
"Я іх уважліва вывучаў. І мая першая прапанова - не трэба імгненна, агулам усё прымаць. Гэта павінен быць эвалюцыйны працэс. Частка рашэнняў сапраўды наспела сёння. Па іншых прапановах размываць паўнамоцтвы кіраўніка дзяржавы мы не будзем", - запэўніў беларускі лідэр.
Пасля чаго дадаў, "што гэта ставіцца перш за ўсё да такіх напрамкаў, дзе вырашаюцца важнейшыя пытанні для любога жыхара, суб'екта гаспадарання і дзяржавы ў цэлым. Больш за тое, часцяком яны носяць незваротны характар".
Адказнасць і паўнамоцтвы
У ходзе нарады Аляксандр Лукашэнка звярнуў увагу, што паўнамоцтвы пераразмяркоўваюць не так часта, таму трэба ўзважыць усе за і супраць, а на чале ўсяго гэтага павінны стаяць такія прыярытэты, як камфорт і дабрабыт насельніцтва.
"Што хвалюе перш за ўсё? Ці гатовы тыя, хто хоча дадатковых паўнамоцтваў, да іх рэалізацыі? Бо гэта не толькі дадатковае права аператыўна і гнутка вырашаць пытанні, але і нагрузка, дадатковая адказнасць. Адказнасць - ключавы аспект ва ўсёй гэтай нашай працы", - асабліва адзначыў ён.
Пры гэтым усе дакументы, якія будуць прымацца па перадачы паўнамоцтваў, абавязаны ўтрымліваць адказ на такое пытанне, як хто будзе несці адказнасць за прынятыя рашэнні, каб пры гэтым не было дваякага трактавання.
"Ці прадуманы магчымыя рызыкі? Ці не здарыцца так, што праз нейкі час у кожным рэгіёне ўсталюецца свая практыка прыняцця рашэнняў, і яна будзе адрознівацца? Да чаго гэта можа прывесці ў сучасным свеце, мы разумеем", - лічыць беларускі лідар.
Аляксандр Лукашэнка падкрэсліў, што ўсе пытанні аб размеркаванні паўнамоцтваў звязаны з будучай канстытуцыйнай рэформай.
"Мы не павінны прымаць рашэнні, якія ў выніку працы над Канстытуцыяй потым прыйдзецца адмяняць або прыводзіць у іншы стан. Таму трэба будзе цесна весці працу з Канстытуцыйнай камісіяй. І на аснове новай Канстытуцыі мы павінны прыйсці да выверанай і ідэальна прадуманай вертыкалі ўлады з абноўленымі паўнамоцтвамі", - канстатаваў ён.
На думку кіраўніка дзяржавы, працэс пераразмеркавання паўнамоцтваў павінен быць завершаны да вынясення на рэферэндум праекта новага Асноўнага закона.
"Гэта значыць на працягу гэтага года трэба канчаткова вызначыцца, якія паўнамоцтвы будуць у прэзідэнта, урада, парламента, губернатараў, калі трэба - і ніжэй", - сказаў ён.
Чытайце таксама:
- Камісія па папраўках у Канстытуцыю пачала прымаць прапановы беларусаў
- Склад пашыраны: Лукашэнка падпісаў указ аб Канстытуцыйнай камісіі
- Лукашэнка расказаў аб рабоце камісіі над змяненнямі ў Канстытуцыі