Цырымонія адкрыцця XXXII летніх Алімпійскіх гульняў адбылася напярэдадні на Нацыянальным стадыёне ў Токіа.
Адразу пасля парада спартсменаў у неба ўзляцелі 1 824 дроны. Падсветленыя агеньчыкамі, яны вельмі эфектна глядзеліся на чорным фоне. Нават людзі, якія пратэставалі супраць Гульняў і сабраліся побач з арэнай, трохі супакоіліся і замерлі, назіраючы за мудрагелістымі фігурамі, што "малявалі" дроны.
Паліцэйскія ў гэты момант выставілі вакол стадыёна ачапленне. А беспілотнікі спачатку згрупаваліся ў выглядзе сімвала Токіа-2020, а затым прынялі форму Зямлі, адлюстраваўшы ўсе кантыненты.
Над стадыёнам разнеслася кампазіцыя "Imagine" Джона Ленана, перапрацаваная Гансам Цымерам спецыяльна для цяперашніх Алімпійскіх гульняў. Паводле задумы рэжысёраў, усё гэта сімвалізавала адзінства - адзін з галоўных прынцыпаў і лозунгаў Алімпіяды ў Токіа.
Самае буйное шоу з удзелам дронаў прайшло ў пачатку 2021 года ў Шанхаі на прэзентацыі прадукцыі аднаго з вытворцаў аўтамабіляў. Тады быў задзейнічаны 3 281 дрон.
Глядзіце таксама:
Цырымонія адкрыцця летніх Алімпійскіх гульняў-2020
Як выглядае алімпійская вёска ў Токіа да пачатку гульняў – відэа
Ці хочуць японцы правядзення Алімпіяды ў гэтым годзе? – відэа