МІНСК, 29 жні – Sputnik. Якія змены чакаюць канцэрн "Белдзяржхарчпрам" і ў чым сэнс стварэння карпарацыі патлумачыў віцэ-прэм'ер Беларусі Аляксандр Субоцін у эфіры YouTube-канала "Галоўны. Тур".
Па словах віцэ-прэм'ера, самае асноўнае, што прыўнясуць змены - цэнтралізацыя кіравання, а гэта ў сваю чаргу дапаможа "не штурхацца на знешнім і ўнутраным рынках".
За аснову хочуць узяць паспяховы прыклад Кітая. "Яны (карпарацыі Кітая - Sputnik), скажам так, больш агрэсіўныя на ўсіх рынках, яны маюць дзяржаўную нейкую частку і дзяржпадтрымку, але больш свабодныя ў прыняцці рашэнняў, больш разняволеныя, больш могуць эканамічна неяк рызыкаваць уваходзячы на рынкі", - патлумачыў Субоцін.
Падыход, калі "усё ў адных руках", дапаможа не толькі пазбегнуць канкурэнцыі паміж сабой, але і ў чымсьці зэканоміць: адзіная служба маркетынгу, знешняга продажу і гэтак далей.
Што скажуць навукоўцы?
Аднак, як гэта будзе ўвасабляцца на практыцы, віцэ-прэм'ер не змог адказаць. Паводле яго слоў, да працы нават падключылі вучоных Нацыянальнай акадэміі навук Беларусі.
"Падыходаў шмат хочам закласці, але што канкрэтна будзе, яшчэ нават я не магу яшчэ адказаць. Праз Акадэмію навук нават пайшлі: там будуць прапрацоўваць гэтае пытанне", - сказаў Субоцін.
У пачатку верасня навукоўцы ўжо будуць прапаноўваць варыянты, як на практыцы можна ўвасобіць змены з карпарацыі ў канцэрн. Па словах віцэ-прэм'ера, не факт, што гэта будзе адзіная карпарацыя па харчовай прамысловасці.
"Можа, гэта будзе кандытарская карпарацыя плюс алкагольная карпарацыя", - разважае Аляксандр Субоцін.
Пры гэтым ён адзначыў, што дзяржкарпарацыя можа стаць не канчатковым варыянтам, а адным з магчымых шляхоў, па якім будзе трансфармавацца "Белдзяржхарчпрам".
Новая карпарацыя
Нагадаем, у мінулы чацвер, 26 жніўня, Аляксандр Лукашэнка прыняў з дакладам старшыню канцэрна "Белдзяржхарчпрам" Анатоля Бубена і віцэ-прэм'ера Аляксандра Субоціна. Падчас сустрэчы абмяркоўвалася пытанне пераўтварэння канцэрна ў дзяржкарпарацыю.
Новая карпарацыя ў харчовай прамысловасці рэспублікі пачне працаваць з новага года і для гэтага ўжо падрыхтавалі праект указа прэзідэнта.
У цяперашні час "Белдзяржхарчпрам" з'яўляецца асноўным вытворцам харчовай прадукцыі ў краіне і праводзіць адзіную эканамічную, тэхнічную і тэхналагічную палітыку ў харчовай прамысловасці рэспублікі, якая ўключае больш за 20 падгалін, што вырабляюць сотні найменняў харчовых тавараў.
Чытайце таксама:
"Белдзяржхарчпрам" стане дзяржаўнай карпарацыяй
Лукашэнка ўбачыў недахопы ў рабоце канцэрна "Белдзяржхарчпрам"
"Белдзяржхарчпрам" распрацаваў вельмі моцную гарэлку - спецыяльна для Кітая