МІНСК, 14 вер - Sputnik. У Беларусь прыйшла чацвёртая хваля каронавіруса, заявіла Міністэрства аховы здароўя ў сваім афіцыйным Telegram-канале.
Сёння на нарадзе ў Савеце Рэспублікі абмеркавалі пытанні барацьбы з каронавірусам і гатоўнасць сістэмы аховы здароўя да новай хвалі ўздыму захворвання на COVID-19. У чарговы раз сітуацыю назвалі "кантралюемай".
"Мы бачым, што пайшоў рост захворвання, у тым ліку і ў сувязі з ростам іншых сезонных захворванняў. І павінны быць да гэтага гатовы", - цытуе БелТА словы старшыні верхняй палаты парламента, упаўнаважанага прадстаўніка кіраўніка дзяржавы ў горадзе Мінску, які курыруе пытанні аховы здароўя , Наталлі Качанавай.
Тым не менш, прысутныя на нарадзе прадстаўнікі міжрэгіянальных штабоў па пытаннях COVID-19 супакойваюць: хоць уздым вострых рэспіраторных інфекцый і каронавіруса адзначаецца, але лічбы захворвання яшчэ не дасягнулі пікаў мінулага года.
"Імунная праслойка дазваляе спадзявацца, што лічбы захворвання будуць ніжэй, чым у мінулым годзе. Але, з іншага боку, мы разумеем, што пераважае дэльта-штам, які валодае большай вірулентнасцю", - папярэдзіў кіраўнік Гродзенскага аблвыканкама Уладзімір Каранік.
Пры гэтым Міністэрства аховы здароўя супакойвае: перадумоў для таго, каб сітуацыя выйшла з-пад кантролю, няма. Як дапаўняе ведамства, асобна на нарадзе стаялі пытанні забяспечанасці лекамі, кіслародам, а таксама гатоўнасць бальніц да новай хвалі пандэміі і аператыўнаму перапрафіляванні ў выпадку неабходнасці.