Кірмаш або Камароўка? Параўналі цэны на гародніну: дзе танней

Карэспандэнт Sputnik ацаніў, наколькі выгадныя цэны восенню 2021, параўнаўшы з галоўным сезонным рынкам краіны - Камароўкай.

Прадстаўнік галоўнага ўпраўлення гандлю і паслуг Мінгарвыканкама Аксана Сапрых раней распавяла, што цэны на кірмашах фарміруюцца, зыходзячы з кан'юнктуры рынку. Паводле яе слоў, на старце паказчыкі могуць быць трохі вышэй, а затым з ростам прапановы - зніжацца.

У якасці параўнальнай базы Sputnik абраў бліжэйшы да Камароўкі кірмаш - на плошчы Бангалор.

Раней і фермераў, і пакупнікоў тут было значна больш: рэгуляваць рух на тэрыторыі парку Дружбы народаў даводзілася ДАІ. Машыны займалі і першую паласу бліжэйшай вуліцы Арлоўскай.

Першыя два кірмашы прайшлі пад акампанемент дажджу: у мінулую нядзелю з’явілася сонца, але працэс пакупак суправаджаўся моцным ветрам.

Камароўка нават у такіх умовах надвор'я выглядае камфортней, але супраць яе адсутнасць найблізкай паркоўкі.

Хадавая гародніна на кірмашы танней, але ў некаторых выпадках пры ўмове куплі не менш за 5 кіло ці цэлага мяшка, а гэта значыць, верагоднасць "сюрпрызу" ўнутры прыкметна павялічваецца.

Кірмаш - з'ява мабільная, але абмежаваная выхаднымі. На рынку гароднінай можна затаварвацца ў любы дзень, адначасна купляючы іншыя неабходныя прадукты.

На мінулых выхадных склалася такая "кан'юнктура цэн", што бульба каштавала 1-1,30 рублі.

Для параўнання: лепшыя суадносіны кошту і памеру бульбы на Камароўцы спынілася на ўзроўні 1,49 за кіло, а самыраспаўсюджаны кошт - 1,80.

Адзін з самых папулярных гатункаў - "Каралева Ганна" - аддавалі на Бангалор за 1,30, а яе паменшаная "копія" на рынку каштавала 1,20.

Моркву, буракі і рэпчаты лук можна было знайсці па рублю ці за рубель дваццаць. Але каля адной з машын гаспадыня ўраджаю катэгарычна адмаўлялася прадаваць "кілаграмчык". На Камароўцы ў большасці выпадкаў усё гэта каштуе ў два разы даражэй, але можна выбраць і аб'ём, і канкрэтную ўпадабаную гародніну.

Капусту па-за залежнасці ад велічыні ў парку Дружбы народаў прапаноўвалі за 1,20. Самы выгадны варыянт на адкрытым рынку - 1,80.

Перац танней, калі купляць сетку - 2,20 за кіло (у сетцы 4-5 кілаграмаў). У розніцу кошт салодкай гародніны нават даражэй, чым на рынку, дзе яго можна ўзяць па 2,50.

А вось агуркі і памідоры лепш купляць на вуліцы Харужай. На Камароўскім рынку цэны такія ж або менш (калі тавар з Украіны) і магчымасць выбару прыкметна шырэй, асабліва ў выходныя.

Традыцыйны восеньскі антыаксідант - журавіны - танней, але нязначна (7 супраць 7,50), і, на першы погляд, на кірмашы было больш смецця.

Былі на плошчы Бангалор і пчаляры, якія прапаноўвалі розныя віды мёду. Кошт стандартны (16-20 рублёў за літр) і характэрны для Камароўкі. Там прадукцыю пчалярства можна знайсці на ўваходзе на адкрыты рынак і на адным з радоў крытага.

Хтосьці рызыкнуў разгарнуць палатку з нехарактэрным для агародніннага кірмашу таварам: ваўнянымі шкарпэткамі. Але, быўшы адзіным, мяркуючы па ўсім, не пралічыўся.

Падобна на тое, кірмашы страцілі тую прывабнасць, якая была раней. Яны могуць быць запатрабаваныя ў тых, хто жыве непадалёк, асабліва сярод людзей старэйшага ўзросту.

Характэрна, што па шляху да прыпынку "Плошча Бангалор" у бок "Рыгі" можна натрапіць на нелегальных гандляроў, якія прапануюць гародніну і садавіну і не толькі ў выхадныя. Памідоры-сліўкі тут па 1,40 рублі супраць 2,50 на кірмашы. Паходжанне сумніўнае, але многіх гэта не спыняе.

Сур'ёзную канкурэнцыю і кірмашам, і Камароўскаму рынку сёння складаюць сеткавыя рэтэйлеры, якія могуць прапанаваць гародніну і садавіну са значнымі зніжкамі. Пакупнік можа выбраць колькі трэба, не асцерагаючыся фразы "рукамі не чапаць".

Больш за тое, купіць гародніну ў сезон па выгодным кошце можна і на папулярнай інтэрнэт-пляцоўцы аб'яваў. Бульба каштуе 80 капеек, моркву, буракі, капусту і лук -па рублю. Праўда, з умовай дастаўкі да хаты пры куплі ад пяці мяшкоў, якія трэба самім несці ў кватэру і пасля вырашыць пытанне з захоўваннем. Таксама ў гэтым выпадку нельга скрупулёзна ацаніць тавар перад пакупкай.