МІНСК, 4 кас – Sputnik. Затрыманы супрацоўнік "Комсомольской правды" Генадзь Мажэйка павінен быць неадкладна вызвалены беларускімі ўладамі, заявіў старшыня Саюза журналістаў Расіі Уладзімір Салаўёў.
Ён заявіў, што Саюз журналістаў Расіі ўважліва сочыць за гэтай сітуацыяй яшчэ з ночы з 1 на 2 кастрычніка.
Салаўёў звязвае ўсе абвінавачанні з прафесійнай дзейнасцю Генадзя Мажэйкі, з тэкстам, які ён апублікаваў 28 верасня, "пасля чаго тэкст правісеў 3 хвіліны".
Гэты выпадак, як і закрыццё сайта "КП" у Беларусі, Салаўёў назваў "адкрытым ціскам на расійскія СМІ".
"Гэта можна расцэньваць як парушэнне свабоды слова, свабоды распаўсюджвання інфармацыі", - дадаў кіраўнік Саюза журналістаў Расіі.
Арганізацыя патрабавала неадкладнага вызвалення Генадзя Мажэйкі і "пакарання ўсіх вінаватых у тым, што яго затрымалі".
Блакіраванне "КП" і арышт журналіста
Па звестках галоўрэда "Комсомольской правды" Уладзіміра Сунгоркіна, прычынай затрымання Генадзя Мажэйкі, як і блакіравання сайта "КП", стала публікацыя 28 верасня аб забойцы афіцэра КДБ у Мінску.
Увечары, 28 верасня, на сайце газеты выйшаў матэрыял аб падазраваным у тэрарызме Андрэе Зельцэры. Падчас затрымання ён зрабіў смяротны стрэл у супрацоўніка спецпадраздзялення КДБ. Матэрыял утрымліваў успаміны аднакласніцы Зельцэра. Праз некалькі хвілін тэкст быў выдалены з сайта "КП в Беларусі", аднак у сераду раніцай, 29 верасня, рэсурс быў заблакіраваны па рашэнні міністэрства інфармацыі Беларусі.
На сёння ад сваякоў журналіста вядома пра вобыск у яго кватэры. Як паведамляе сайт "Комсомольской правды" са спасылкай на маці Генадзя Мажэйкі, вобыск прайшоў у рамках адразу двух крымінальных спраў - аб распальванні варожасці і абразе прадстаўніка ўлады.
Афіцыйнай інфармацыі няма
У рэдакцыі "Комсомольской правды" пакуль няма афіцыйнай інфармацыі з Мінска пра затрыманне журналіста. Следчы камітэт Беларусі па-ранейшаму не пацвярджае інфармацыю аб затрыманні супрацоўніка "Комсомольской правды" Генадзя Мажэйкі.
"Няма ніякай інфармацыі, сказаць пакуль нічога не магу", - заявіў Sputnik афіцыйны прадстаўнік Следчага камітэта Сяргей Кабаковіч.
Чытайце таксама:
Рэдакцыя "Комсомольской правды" наняла Мажэйку двух адвакатаў
Галоўрэд "Комсомольской правды" заявіў аб знікненні журналіста Мажэйкі
Крэмль: чакаем ад Мінска забеспячэння працы расійскіх СМІ ў Беларусі
Мінінфарм назваў прычыну блакіроўкі сайта kp.by
Галоўны рэдактар: "КП в Беларуси" ўпершыню не змагла надрукаваць нумар