МІНСК, 7 кас - Sputnik. Беларусі і Венесуэле трэба выбудаваць больш моцнае супрацоўніцтва, заявіў прэзідэнт Аляксандр Лукашэнка на сустрэчы са спецпасланнікам прэзідэнта Венесуэлы Аданам Чавесам Фрыясам.
Паводле слоў беларускага лідэра, настаў час падвергнуць рэвізіі адносіны дзвюх краін.
"У Беларусі не проста вельмі добра ведаюць, памятаюць нашага сябра - твайго брата (экс-прэзідэнта Венесуэлы Уга Чавеса - Sputnik). Добра, што ты прыехаў у гэты час, ёсць пра што пагаварыць, ёсць пытанні, якія мы павінны абмеркаваць", - сказаў Лукашэнка.
Ён адзначыў, што сутнасць сустрэчы не ў "тых санкцыях, якія ўведзены супраць Венесуэлы і Беларусі".
"У нас ёсць вельмі сур'ёзная, магутная база нашага супрацоўніцтва, закладзеная яшчэ ў часы Чавеса. Трэба шчыра сказаць, і Венесуэла, і Беларусь слаба карыстаюцца тымі перавагамі, якія былі створаныя шмат гадоў таму", - заявіў беларускі прэзідэнт.
Вялікія планы
Па словах кіраўніка дзяржавы, краінам ёсць на што абаперціся, каб у сучасных умовах супрацьдзейнічаць любым пагрозам. Лукашэнка запэўніў, што Беларусь поўная рашучасці дзейнічаць у гэтым кірунку.
"Гэта дзіўна, што мы маем у гандлёва-эканамічнай сферы адносіны такога ўзроўню. Пры гэтым усё, што ёсць у Венесуэле, трэба Беларусі. Тое, што ёсць у Беларусі, трэба ў Венесуэле", - адзначыў прэзідэнт.
Краінам трэба выбудаваць план па аднаўленні адносін і рэалізаваць яго "ў бліжэйшыя два-тры гады", лічыць беларускі лідэр.
У сваю чаргу Адан Чавес заявіў, што венесуэльскі народ у адносінах да беларускага народу адчувае "такія ж эмоцыі".
"Спадар Мадура перадае вам велізарнае прывітанне. Наша стаўленне да беларускага народа не змянілася, бо ў сваёй большасці венесуэльскі народ – гэта "чавіскі народ". Ён з сапраўды такой жа любоўю адносіцца да вас", - сказаў спецпасланнік.
Адан Фрыяс і яго візіт
Нагадаем, Адан Чавес Фрыяс - брат былога лідэра Венесуэлы Уга Чавеса, які памёр ад анкалагічнага захворвання ў пачатку 2013 года.
У гэтыя дні спецпасланнік цяперашняга венесуэльскага лідэра Фрыяс наведвае Беларусь. У праграме яго візіту таксама значыцца сустрэча са старшынёй Савета Рэспублікі Наталляй Качанавай і старшынёй Палаты прадстаўнікоў Уладзімірам Андрэйчанкам.
Чакаецца, што венесуэльскі госць выступіць з лекцыяй у БДУ і прыме ўдзел у адкрыцці выставы ў Нацыянальнай бібліятэцы.
Раней Адан Чавес ужо бываў у Беларусі - у кастрычніку 2017 года ён быў у складзе ўрадавай дэлегацыі ў час візіту ў Мінск прэзідэнта Венесуэлы Нікаласа Мадуры.