МІНСК, 21 кас - Sputnik. Пытанні падрыхтоўкі да пасяджэння Вышэйшага Дзяржаўнага Савета Саюзнай дзяржавы абмеркавалі ў тэлефоннай размове міністры замежных спраў Беларусі і Расіі, паведамілі ў беларускім МЗС.
"Падчас размовы Уладзімір Макей і Сяргей Лаўроў абмяняліся інфармацыяй аб пандэмічнай сітуацыі ў дзвюх краінах. Бакі таксама абмеркавалі пытанні падрыхтоўкі да пасяджэння Вышэйшага Дзяржаўнага Савета Саюзнай дзяржавы", - паведамілі Sputnik ў чацвер у прэс-службе МЗС Беларусі.
Акрамя гэтага, міністры разгледзелі ход падрыхтоўкі да маючага адбыцца сумеснага пасяджэння калегій знешнепалітычных ведамстваў дзвюх краін, у межах якога адбудзецца падпісанне Праграмы ўзгодненых дзеянняў у галіне знешняй палітыкі дзяржаў - удзельніц Дагавора аб стварэнні Саюзнай дзяржавы на 2022-2023 гады.
Кіраўнікі знешнепалітычных ведамстваў закранулі пытанні ўзаемадзеяння ў рамках міжнародных арганізацый.
Нагадаем, што міністр замежных спраў Расіі Сяргей Лаўроў быў з візітам у Мінску на мінулым тыдні. Ён прыняў удзел у пасяджэнні Савета міністраў замежных спраў СНД, а таксама абмеркаваў са сваім беларускім калегам работу расійскіх СМІ ў Беларусі.
"У нас ёсць агульнае разуменне неабходнасці зрабіць усё, каб расійскія СМІ ў Беларусі і беларускія СМІ ў Расіі працавалі ў максімальна камфортных умовах", - адзначыў Сяргей Лаўроў па выніках СМЗС.
Па словах міністра, у бакоў ёсць "некаторыя ідэі", якія будуць рэалізаваны ў бліжэйшы час.