МІНСК, 5 ліс – Sputnik. Афіцыйную пазіцыю краіны па пытаннях знешняй палітыкі як у Беларусі, так і ў Расіі, вызначаюць прэзідэнты, аб гэтым паведаміў прэс-сакратар расійскага лідэра Дзмітрый Пяскоў.
"У Беларусі парламент не вызначае знешнюю палітыку. Як і ў нас, гэта прэрагатыва прэзідэнта", – заявіў Пяскоў у эфіры радыёстанцыі "Говорит Москва".
Напярэдадні старшыня Пасткама па міжнародных справах Палаты прадстаўнікоў Беларусі Андрэй Савіных у эфіры YouTube-канала "Соловьев Live" паведаміў аб тым, што заява прэзідэнта Беларусі Аляксандра Лукашэнкі на пасяджэнні Вышэйшага дзяржсавета Саюзнай дзяржавы аб Крыме з'яўляецца прызнаннем паўвострава тэрыторыяй Расіі.
Падчас відэаканферэнцыі Вышэйшага дзяржсавета, якая прайшла ў чацвер, беларускі лідэр паскардзіўся, што прэзідэнт Расіі Уладзімір Пуцін не паклікаў яго з сабой у Крым, дзе праходзіла афіцыйнае святкаванне Дня народнага адзінства.
Крым атрымаў статус расійскага рэгіёну пасля праведзенага там у сакавіку 2014 года рэферэндуму, на якім 96,77% выбаршчыкаў Крыма і 95,6% жыхароў Севастопаля выказаліся за ўваходжанне ў склад Расіі. Аднак Украіна па-ранейшаму лічыць Крым сваёй, але часова акупаванай тэрыторыяй. У Крамлі неаднаразова заяўлялі, што жыхары Крыма дэмакратычным шляхам у поўнай адпаведнасці з міжнародным правам і Статутам ААН прагаласавалі за ўз'яднанне з Расіяй. Паводле слоў расійскага прэзідэнта Уладзіміра Пуціна, пытанне Крыма "закрыта канчаткова".