МІНСК, 8 ліс – Sputnik. Беларуская авіякампанія "Белавія" прадала на таргах самалёт Boeing 737-500 за 1,264 мільёна долараў, інфармацыя аб гэтым размешчана на партале "ІПМ-Таргі".
Удзел у таргах прыняў толькі адзін удзельнік, якому і дастаўся самалёт. Цяпер на працягу 15 працоўных дзён пасля правядзення аўкцыёну яго пераможца павінен заключыць дамову куплі-продажу.
У склад лота таксама ўвайшла дапаможная сілавая ўстаноўка і два рухавікі. У "Белавія" раней пацвердзілі Sputnik, што самалёт яшчэ можа лятаць. Працаздольнасць ДВС, вузлоў і агрэгатаў борта не правяралася, таксама арганізатары аўкцыёну не выключаюць, што пры інструментальным кантролі, дыягностыцы і разборцы магчыма выяўленне ўтоеных дэфектаў.
Boeing 737-500 пад нумарам EW-250PA быў набыты ў 2003 годзе і налётаў 30739 гадзін. Агулам ён выканаў 17596 рэйсаў і 133 разы прайшоў тэхабслугоўванне. "Пяцісотка" стала першым самалётам заходняй вытворчасці ў паветраным флоце беларускай кампаніі. У чэрвені гэтага года пасля 17 гадоў службы "Боінг" адправілі "на пенсію".
У авіякампаніі застаўся яшчэ адзін такі ж Boeing 737-500, які плануецца вывесці з эксплуатацыі да канца 2021 года.