Эвакуацыйны рэйс для мігрантаў з Мінска ў Багдад адменены – аэрапорт

МІНСК, 25 ліс – Sputnik. Авіярэйс, які павінен быў вывезці 25 лістапада з Мінска мігрантаў у Ірак, адменены паводле рашэння авіякампаніі Iraqi Airways, паведамілі Sputnik у прэс-службе Нацыянальнага аэрапорта.

Як раней паведамлялася, больш за 100 мігрантаў планавалі вылецець у чацвер з Беларусі ў Ірак. Напярэдадні замежнікі прыбылі ў аэрапорт і чакалі адпраўлення ў транзітнай зоне.

У сваю чаргу ў "Іракскіх авіялініях" заявілі, што рэйсы ў Беларусь адменены на 25 і 27 лістапада.

Самалёт з Багдада ў Мінск павінен быў прыляцець у чацвер 25 лістапада. Прыбыццё борта чакалася ў 12.45 па мінскім часе.

Першы спэцрэйс для вяртання іракскіх бежанцаў арганізавалі тыдзень таму, 18 лістапада. Тады прыляцеў Boeing 747, і ў выніку зарэгістраваўся 431 пасажыр (не лічачы маленькіх дзяцей на руках).

Прадстаўнік пасольства Ірака ў Маскве, пры садзейнічанні якога арганізавалі "эвакуацыю", заявіў Sputnik, што рэйсы будуць арганізоўваць па меры з'яўлення заявак ад жадаючых вярнуцца на радзіму.

Дыпламаты падкрэслівалі, што ў Ірак ляцяць толькі тыя, хто вырашыў вярнуцца дадому добраахвотна, нікога гэта рабіць не прымушаюць.

У мінулы чацвер па раскладзе самалёт павінен быў выляцець у 13:45, але быў затрыманы з-за мігрантаў, якія спазніліся. Час вылету перанеслі на 14:30, але ў выніку лайнер вылецеў яшчэ пазней.

Тады самалёт Iraqi Airways спачатку прызямліўся ў Эрбіле - сталіцы аўтаномнай вобласці Курдыстан, а затым накіраваўся ў Багдад. Прэс-сакратар урада Іракскага Курдыстана Гутыяр Адэль паведамляў, што каля 90% пасажыраў на борце спецрэйса былі жыхарамі аўтаномнага рэгіёна.