Лукашэнка ўручыў касманаўту Навіцкаму ордэн Дружбы народаў

МІНСК, 21 сне – Sputnik. Прэзідэнт Беларусі Аляксандр Лукашэнка ў Палацы Незалежнасці ўручыў касманаўту Алегу Навіцкаму ордэн Дружбы народаў, паведамілі ў прэс-службе кіраўніка дзяржавы.

Раней стала вядома, што беларускі лідар падпісаў указ, паводле якога расійскі касманаўт беларускага паходжання быў удастоены высокай узнагароды. Гэты ордэн ён атрымаў за дасягненні ў вывучэнні космасу і асабісты ўклад ва ўмацаванне міжнародных сувязей.

"Алег, нарэшце ты на "грэшную" зямлю спусціўся!" - такімі словамі сустрэў касманаўта Аляксандр Лукашэнка.

"Не на грэшную, на лепшую!" - хутка адказаў Алег Навіцкі.

"Табе лепш відаць звысоку", - парыраваў кіраўнік дзяржавы.

"Гэта проста шчасце – быць дома", - запэўніў у сваю чаргу герой Расіі.

Пасля чаго беларускі лідар задаў пытанне Навіцкаму, чаму ён прыехаў у Мінск без сваіх калег з Міжнароднай касмічнай станцыі.

На думку Лукашэнкі, у Навіцкага ўнутраны і знешні складнікі славянскія і, магчыма, у ім ёсць і беларускае, і рускае, напэўна, і ўкраінскае.

"Тое, што ён робіць для сваёй радзімы, ён робіць правільна. Усё ж такі рана ці позна ты прыйдзеш на гэту зямлю, таму не трэба страчваць свае карані. Ён – сапраўдны чалавек, які з'ядноўвае народы", - лічыць кіраўнік дзяржавы.

Кіраўнік дзяржавы расказаў герою Расіі, што ў Беларусі рыхтуюць некалькі чалавек для палёту ў космас. Пасля чаго Аляксандр Лукашэнка выказаў надзею, што Навіцкі прыме ўдзел у адборы і падрыхтоўцы да палёту будучых касманаўтаў.

Раней 4 лістапада падчас пасяджэння Вышэйшага дзяржаўнага савета Саюзнай дзяржавы Уладзімір Пуцін заявіў, што падтрымлівае прапанову ўключыць у склад Міжнароднай касмічнай станцыі беларускага касманаўта.

Расійскі лідар адзначыў, што гэта пытанне ўжо абмяркоўвалася з кіраўніком "Роскосмоса" Дзмітрыем Рагозіным. "Трэба толькі ўзгадніць дэталі. Яны ёсць, і яны нескладаныя для таго, каб быць узгодненымі", - адзначыў на пасяджэнні Вышэйшага дзяржсавета Уладзімір Пуцін.

Як раней паведамлялася, ураджэнец Беларусі Алег Навіцкі пачаў касмічную падрыхтоўку ў 2007 годзе. Да таго, як яго залічылі ў касмічны атрад, на розных відах самалётаў ён налятаў амаль 700 гадзін.

Паляцеў на арбіту Навіцкі на караблі "Саюз ТМА-06М" у складзе экіпажа МКС-33/34. Акрамя яго ў кастрычніку 2012 года ў космас паляцелі Яўген Тарэлкін і Кевін Форд. Яны наляталі больш за 140 сутак. Экіпаж шчасна вярнуўся на Зямлю 16 сакавіка 2013 года.

Ордэн Дружбы народаў – адна з галоўных дзяржаўных узнагарод у Беларусі. Ён быў заснаваны ў 2002 годзе. Прысуджаецца за ўмацаванне міру, дружалюбных адносін і супрацоўніцтва паміж дзяржавамі, за высокія дасягненні ў гуманітарнай і дабрачыннай дзейнасці. Першае ўзнагароджанне адбылося 5 лiпеня 2002 года. На 1 студзеня 2021 года колькасць узнагароджаных – 57 чалавек.