Sputnik паглядзеў, ці рэальна ў апошні момант памяняць усе планы і махнуць куды-небудзь на пару дзён для святкавання Новага года. Спойлер: можна, але амаль немагчыма.
Новы год у пушчы
У Нацыянальным парку "Белавежская пушча" ўсе гасцінічныя комплексы былі забраніраваны задоўга да Новага года.
Адзіная свабодная дата ў снежні – 26-е чысло. Але прапанова мала прывабная: наўрад ці нехта захоча прыехаць толькі на суткі, у нядзелю. Вольныя нумары ёсць толькі з 9-га студзеня.
Дзед Мароз і Снягурачка ў рэзідэнцыі ў Белавежскай пушчы
© Sputnik / Сергей Лескеть
У службе браніравання падзяліліся, што навагоднія даты браніруюць яшчэ з лета. Вялікі попыт сярод расіян, любяць адпачываць у нацпарку і самі беларусы. Дарэчы, калі браніраваць гасцініцу загадзя, можна зэканоміць да 20%.
Цэны на навагоднія даты, вядома, вышэйшыя, чым у звычайныя дні. Так, трое сутак пражывання (30 снежня - 1 студзеня) на дваіх у адным з комплексаў сёлета абыходзіцца ў 1340 беларускіх рублёў (амаль $530). У кошт уваходзіць усё: ад пражывання да навагодняй праграмы, экскурсій і іншых актыўнасцяў.
Але калі вельмі хочацца правесці Новы год у Белавежскай пушчы, на ўсім вядомым сайце па пошуку і браніраванні жылля можна яшчэ паспрабаваць пашукаць аграсядзібы. Так, у адной з іх прапануюць правесці навагоднюю ноч за $200 з кампаніі – увесь комплекс і лазня вашы, але ў кошт не ўваходзіць больш нічога.
Санаторыі: адпачыць і аздаравіцца
Самыя папулярныя санаторыі краіны таксама ўжо даўно забраніраваны: яшчэ са жніўня пастаяльцы выбралі сабе нумары. Традыцыйна – вялікі попыт сярод грамадзян Расіі.
На даты з 1 па 29 снежня санаторый "Пліса" ўстанавіў калядны тарыф на некаторыя нумары - мінус 35%. Але на сам Новы год усё ўжо даўно занята: яшчэ з верасня, удакладнілі ў аддзеле браніравання.
Лячэбна-аздараўленчая база санаторыя "Прыазёрны"
© Sputnik / Виталий Чуясов
У рэзерве застаўся адзін нумар, які гатовы прапанаваць тым, хто вельмі-вельмі хоча адпачыць у санаторыі, але з некалькімі ўмовамі: перадаплата, бронь не менш за дзве ночы і аплата банкету. Абыйдзецца гэтая прапанова на дваіх у 760 беларускіх рублёў ($300) + 290 рублёў ($115) за навагодні стол і праграму.
Жадаючых адпачыць на Нарачы аказалася таксама нямала і многія прадбачліва паклапаціліся пра гэта загадзя. Каб адсвяткаваць Новы год у санаторыі "Прыазёрны", давядзецца браніраваць усю праграму адпачынку ад дзесяці сутак. Пуцёўка са СПА і лячэннем на суткі на аднаго чалавека каштуе ад 130 рублёў (крыху больш за $50). У кошт уключаны банкет з Дзедам Марозам і Снягуркай, музычныя праграмы - практычна кожны дзень, аўтаэкскурсіі, ёга, зімовыя актыўнасці на свежым зімовым паветры.
Кватэра, катэдж і бурнае святкаванне
Здача кватэр на суткі ў навагоднія святы становіцца вельмі запатрабаванай паслугай. Праўда, і тут аб даху над галавой трэба паклапаціцца загадзя. Да таго ж, не ўсе кватэраздатчыкі гатовы прадаставіць сваю жылплошчу для кампаніі "нападпітку".
На сайце па браніраванні жылля адразу папярэджваецца: на выбраныя даты - 31 снежня і 1 студзеня - ужо недаступныя 87% жылля. Прапануецца 125 варыянтаў, сярод якіх 69 прыпадае на гасцініцы і атэлі. Калі ж задаць запрос па крытэрыі толькі кватэры, то на сайце недаступна ўжо 94% апартаментаў на Новы год.
Цэны, вядома, вельмі куслівыя. Большасць прапаноў стартуюць ад 300 рублёў амаль $120), сярэдні ж цэннік на адну навагоднюю ноч на дваіх вагаецца ў раёне 400-500 рублёў ($160-200). Па коштавым фільтры ад 0 да 142 рублёў прапануецца толькі адна кватэра – за 136 рублёў ($53) на ўскраіне горада.
Уладальнікі нерухомасці тлумачаць такі кошт не толькі павышаным навагоднім попытам: тут яшчэ закладваюцца магчымыя рызыкі і выдаткі з-за бурнай вечарынкі.
"У гэтым годзе чамусьці попыт крыху ніжэй. Наогул традыцыйна цэннік на пасутачную арэнду паднімаюць у два разы. Але нямногія гатовыя так рызыкаваць: альбо ставяць вельмі вялікую суму, альбо аддаюць перавагу наогул не здаваць. Бо можна сапсаваць сабе свята: ездзіць на п'яныя разборкі сярод ночы і супакойваць бурную кампанію, або прыбіраць наступствы вечарынкі і атрымаць у выніку разгромленую кватэру", – тлумачыць уладальнік аднапакаёвай кватэры ў цэнтры, якую ён здае па сутках.
Таксама на Sputnik:
У навагоднюю ноч мінчане змогуць убачыць у Свіслачы сапраўдную "Піранню"
У Косаўскім палацы ўпершыню адбыўся навагодні баль - фота
Ёлачныя кірмашы адкрыліся ў Мінску: поўны спісак, дзе можна купіць ёлку
БЧ прызначыла 16 дадатковых цягнікоў на навагоднія святы
Мінск у агнях: навагоднюю ілюмінацыю запалілі ў сталіцы – фота